Aıǵanym qonysy qaıta qalpyna keltirilip jatyr - SQO
SQO-da 600-ge jýyq tarıhı-mádenı eskertkish bolsa, sonyń 8-iniń respýblıkalyq mártebesi bar. Olardyń jaǵdaıy únemi mamandardyń baqylaýynda.
Byltyr tarıhı-mádenı murany qorǵaý jáne paıdalaný ortalyǵy Petropavldaǵy jáne Esil, Ýálıhanov, Jambyl, Aıyrtaý aýdandarynda 16 eskertkishke monıtorıng jasady. Onyń qorytyndysy boıynsha, tarıhı-mádenı nysandardyń ıelerine jáne ony paıdalanýshylarǵa anyqtalǵan olqylyqtardy joıýǵa 7 eskertý jiberilgen.
«Petropavl qalalyq ákimdigine qonys aýdarýshylar pýnktine jáne saıası qýǵyn-súrgin qurbandaryna arnalǵan eskertkishke qatysty, bankterdiń biriniń fılıalyna kópes Shafeevtiń úıine baılanysty eskertýler boldy», - deıdi SQO tarıhı-mádenı murany qorǵaý jáne paıdalaný ortalyǵynyń dırektory Raqat Mambetalınov.
Byltyr óńirde 4 nysan bıýdjet jáne ony paıdalanýshylar esebinen jónge keltirildi. Osy maqsatqa 65 mln teńge jumsaldy. Qalpyna keltirilgen ǵımarattardyń biri – S.Muqanov turǵan úı. Jazýshynyń 120 jyldyq mereıtoıyna oraı Jambyl aýdany Sábıt aýylyndaǵy murajaıdyń ishi-syrty jóndelip, esik-terezeleri jańartyldy. Mańaıy da jónge keltirildi.
Bıyl Aıyrtaý aýdanyndaǵy Aıǵanym qonysynda jóndeý jumystary jalǵaspaq. 1824 jyly salynǵan úı ótken ǵasyrdyń basynda órtengen.
Tek 1993 jyly qystaqtyń ornynda qaıtadan ǵımarat boı kótergen edi. 2019 jyldan beri nysanda qalpyna keltirý jumystary júrgizilip jatyr. Bıyl respýblıka qazynasynan osy maqsatqa 25 mln teńge bólindi.
