Aıǵa jasandy adamdar ushyp jatyr
ASTANA. 23 qyrkúıek. Qazaqparat - AQSh-tyń Ulttyq ǵarysh agenttigi aspanǵa adam tárizdes robottardy ushyrmaq. Bul salaǵa arnap 2,7 mıllıon qarjy bólindi.
Baq.kz aqparattyq portalynyń habarlaýynsha, aıǵa jasandy adamdy ushyrý jobasyn NASA agenttigi men AQSh-tyń Ulttyq ǵylymı qory birlesip jasaǵan. Qazirdiń ózinde robottardy jasaýǵa arnalǵan segiz joba óz isin bastap ketti. Oǵan 150 myń jáne 1 mıllıon AQSh dollary kóleminde grant bólinbek. Olardyń ishinde ǵaryshta qaýipti jaǵdaı týǵan kezde oǵan tótep bere alatyn, adamnyń ornyn aýystyratyn qańqa-robottar jumys isteıdi. Mamandardyń sózine sensek, qańqa-qultemirlerdiń «terisi» kez kelgen aýa raıyna tótep beredi, jyrtylmaıdy, qatty qyzǵanda kúımeıdi, ózi jeńil qozǵalyp, kádimgi adam kire almaıtyn jerge kirip, maıda-shúıde jumystardy atqara beredi. «Bul jobaǵa biz úlken úmit artyp otyrmyz. Óıtkeni 2025 jyly qaýipti asteroıd jerdi janap ótedi, onyń zardaby úlken bolýy múmkin. Sondyqtan asteroıdti aldyn ala zertteýimiz qajet. Ekinshiden, 2035 jyly biz Marsqa sapar shegemiz», - deıdi NASA agenttiginiń tehnologııa jónindegi dırektory Meıson Pek. Aıta keteıik, mundaı joba AQSh-ta burynnan beri qolǵa alynyp keledi. 2011 jyly «Juldyzdy soǵys» fılmindegi keıipkerdiń atymen atalǵan Robonaut 2 (R2) halyqaralyq ǵarysh stansysyna jiberilgeni belgili. Oǵan 40-qa jýyq tetik pen rettegish ornatylǵan, qultemir arnaıy synaq, tájirıbe retinde stansyda jumys istep jatyr. Atap aıtar bolsaq, ol ydys jýyp, «ǵarysh kemesiniń» ishin tazartady, aýasúzgish jabdyǵyn aýystyryp otyrady. Aldaǵy ýaqytta ol ǵaryshtyń ashyq keńistigine shyǵyp, jóndeý jumystaryna qatysyp, ǵaryshkerlerge kómektespek.
Alash aınasy
