Áıeline qol jumsaǵan kúdikti dıplomatııada 15 jyldan astam qyzmet etken

ASTANA. KAZINFORM – Syrtqy ister mınıstrliginiń resmı ókili Aıbek Smadııarov áıelin urdy dep kúdikke alynǵan Qazaqstannyń BAÁ-degi elshiliginde keńesshi Sáken Mamashqa qatysty túsinik berdi.

«Syrtqy ister mınıstrligi oqıǵa bolǵan sátten bastap bul isti erekshe baqylaýǵa aldy. Karına Mamashtyń kúıeýi 6 mamyrda elshilikten dereý Qazaqstanǵa qaıtarylady degen tapsarma berildi. Elge kelgennen (S. Mamash) keıin, zańnamaǵa sáıkes ony qyzmetinen bosattyq», - dedi A. Smadııarov mınıstrliktegi aptalyq brıfıngide tilshiler suraǵyna jaýap bere otyryp.

Bul rette resmı ókil elshiliktiń burynǵy qyzmetkerine qatysty tergeý júrip jatqanyn eske saldy.

«Biz bul qylmystyq iske aralasa almaıtynymyz túsinikti. Búgin Karına Mamashpen kezdestim jáne ol búkil mán-jaıdy aıtyp berdi. Atap aıtqanda, Syrtqy ister mınıstrligi Karınaǵa barlyq kómekti jasaıdy», - dedi ol.

A. Smadııarov qyzmetinen bosatylǵan S. Mamash dıplomatııalyq salada 15 jyldan astam jumys istegenin aıtty.

Buǵan deıin Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetetini, tipti jubaıynyń ápkesine de qol kótergeni týraly aqparat taraǵan edi.

Bul fakti boıynsha qylmystyq is qozǵaldy.

QR Syrtqy ister mınıstrligi zardap shekken qazaqstandyqtyń BAÁ-den otanyna oralýyna kómektesti

Karına Mamash Qazaqstanǵa balalarymen birge ushyp kelgen. Onyń anasy men ápkesi de daǵdarys ortalyǵyna ornalastyrylǵan.