Alty jylǵa sottalǵan Sáken Mamash dıplomat dárejesinen aıyryldy

ASTANA. KAZINFORM – Búgin Astana qalasynyń qylmystyq ister jónindegi aýdanaralyq sotynda eks-dıplomat Sáken Mamashqa úkim shyqty.

- Qylmystyq kodekstiń 49-babyna sáıkes, Sáken Mamash 1-synypty keńesshi dıplomatııalyq dárejesinen aıyryldy, - dedi sýdıa Artýr Abdyhanov úkimdi oqı turyp.

Úkimde aıtylǵandaı, jábirlenýshi tarap S.Mamashty 7 jyl bas bostandyǵynan aıyrýdy suraǵan. Sondaı-aq sottalýshy kinásin moıyndamady. Osy oraıda qorǵaýshy tarap qylmystyq quqyq buzýshylyq quramynyń bolmaýyna baılanysty aqtaýdy surady.

Alaıda sottalýshynyń kinási jábirlenýshiniń, kýá, aıǵaqtarymen, saraptamalyq qorytyndy, beınejazbalar, skrınshot jáne ózge de is materıaldarymen dáleldendi.

Buǵan deıin habarlaǵanymyzdaı, eks-dıplomat Sáken Mamash 6 jylǵa sottaldy. 

Eske sala ketsek, byltyr mamyrda Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetkeni, tipti jubaıynyń ápkesine de qol kótergeni týraly habarlaǵan edik.

Artynsha áıelin urdy dep aıyptalǵan qazaqstandyq dıplomatqa qylmystyq is qozǵaldy. 

Sondaı-aq elshi keńesshisiniń áıeli Karına Mamash daǵdarys ortalyǵyna ornalastyryldy. 

Keıin áıelin urǵan eks-dıplomatqa qatysty taǵy bir qylmystyq is qozǵaldy. 

Bıyl 21 mamyrda áıelin únemi uryp kelgen eks-dıplomat Sáken Mamashtyń isi sotqa jiberildi. 

Al 10 maýsymda Astanada eks-dıplomat Sáken Mamashqa qatysty sot otyrysy bastaldy. 

Aıta keteıik, eks-dıplomat Sáken Mamashqa qatysty sot otyrysy jabyq ótti.