Áıelin urdy dep aıyptalǵan qazaqstandyq dıplomatqa qylmystyq is qozǵaldy
ASTANA. KAZINFORM – Buǵan deıin Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetetini, tipti jubaıynyń ápkesine de qol kótergeni týraly aqparat taraǵan edi.
Astana qalasynyń polıtsııa departamenti osy oqıǵaǵa qatysty resmı málimdeme jasady.
«Bul fakti boıynsha qylmystyq is qozǵaldy. Saraptama taǵaıyndaldy, tergeý júrip jatyr. Tergeý múddesi úshin ózge aqparat jarııa etilmeıdi» delingen resmı málimette.
Esterińizge salsaq, Qazaqstannyń BAÁ-degi elshiliktiń keńesshisi Sáken Mamashtyń jubaıy Karına Mamash 10 jyl boıy zorlyq-zombylyq kórip kele jatqanyn málimdegen bolatyn.
«Maǵan fızıkalyq, jynystyq, emotsıonaldyq, turmystyq zorlyq kórsetti. Kúıeýimniń maǵan jasaǵan barlyq qııanaty úshin dıplomatııalyq mártebesinen aıyryp, túrmege jabylǵanyn qalaımyn», - degen edi ol.
QR Syrtqy ister mınıstrligi zardap shekken qazaqstandyqtyń BAÁ-den otanyna oralýyna kómektesti.
Karına Qazaqstanǵa balalarymen birge ushyp kelgen. Onyń anasy men ápkesi de daǵdarys ortalyǵyna ornalastyrylǵan.
