Áıelin únemi uryp kelgen eks-dıplomat Sáken Mamash qamaýǵa alyndy — polıtsııa

ASTANA. KAZINFORM — Qazaqstannyń Birikken Arab Ámirlikterindegi elshiniń keńesshisi bolǵan Sáken Mamashtyń áıelin júıeli túrde urǵany dáleldendi.

Bul týraly elordanyń polıtsııa departamenti habarlaıdy. 

— Ótken jyly burynǵy elshi keńesshisine qatysty jubaıyna júıeli túrde qol jumsaý faktisi boıynsha qylmystyq is qozǵaldy. Polıtsııa tarapynan jedel-tergeý toby quryldy. Oqıǵanyń barlyq mán-jaıyn anyqtaý úshin qajetti saraptamalar kesheni júrgizildi, — delingen habarlamada. 

Aqparatta aıtylǵandaı, jedel tergeý jáne saraptama nátıjesinde eks-dıplomattyń isine qatysty aıtarlyqtaı dálel jınalǵan. 

— Tergeý nátıjesi boıynsha kúdikti Sáken Mamashqa qatysty tergeý soty qamaýda ustaý túrindegi bultartpaý sharasyn taǵaıyndady, — deıdi elorda polıtsııa departamentinen.

Sotqa deıingi tergeý múddesine baılanysty atalǵan iske qatysty basqa málimetter jarııa etilmeı otyr. 

Eske sala ketsek, byltyr mamyrda Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetkeni, tipti jubaıynyń ápkesine de qol kótergeni týraly habarlaǵan edik. 

Artynsha áıelin urdy dep aıyptalǵan qazaqstandyq dıplomatqa qylmystyq is qozǵaldy. 

Sondaı-aq elshi keńesshisiniń áıeli Karına Mamash daǵdarys ortalyǵyna ornalastyryldy. 

Karına Mamash jeke basyna qaıta qaýip tóngenin aıtty.

Osy jaıttan keıin áıelin urǵan eks-dıplomatqa qatysty taǵy bir qylmystyq is qozǵaldy.