Áıelin pyshaqtaǵan er adamdy ustaýǵa qatysqan polıtsııa qyzmetkerlerine qatysty qyzmettik tergeý júrgizilip jatyr

AQTAÝ. KAZINFORM – Polıtsııa qyzmetkerleriniń is-áreketine qatysty qyzmettik tergeý júrgizilip jatyr, - dep habarlady polıtsııa departamentiniń baspasóz qyzmeti.

Eske salaıyq, Mańǵystaýda Munaıly aýdanynda kúıeýi áıelin kóshede turǵyndardyń kóz aldynda pyshaqtap tastaǵan edi. Saldarynan 24 jastaǵy áıel aýyr dene jaraqattaryn alyp, aýrýhanaǵa jetkizildi. 

Dárigerler naýqasqa shuǵyl ota jasap, aman alyp qaldy. Áıeldiń aıaǵy aýyr ekeni belgili boldy. 

Osy oqıǵa boıynsha polıtsııa qylmystyq is qozǵap, kúdiktini qamaýǵa aldy. Sondaı-aq, kúdiktini ustaýǵa qatysqan ishki ister organdarynyń qyzmetkerlerine qatysty da tergeý júrip jatyr. 

— Jubaıyna pyshaq salý deregi boıynsha kúdikti ustalyp, ýaqytsha qamaý ızolıatoryna qamaýǵa alyndy. Kisi óltirýge oqtalý deregimen qylmystyq is qozǵaldy. Jábirlenýshi medıtsınalyq mekemde. Qazirgi tańda onyń jaǵdaıy turaqty. Polıtsııa qyzmetkerleriniń is áreketterine qatysty tergeý júrgizilip jatyr. Nátıjesine qaraı Quqyqtyq baǵa beriletin bolady. Tergeý múddesi úshin ózge aqparat jarııa etilmeıdi, — deıdi Mańǵystaý oblystyq polıtsııa departamenti bastyǵynyń orynbasary Іlııas Jumaǵulov.