Áıelin baltamen shapqan: jábirlenýshiniń jaǵdaıy belgili boldy

QYZYLORDA. KAZINFORM – Qyzylorda oblysy Shıeli aýdanynyń Bala bı aýylynda áıeliniń qolyn baltalap tastady degen kúdikpen 44 jastaǵy er adam qamaýǵa alyndy. 

Kúdikti baltamen áıelin birneshe ret uryp, saýsaqtaryn shapqan. Bul boıynsha Qylmystyq kodekstiń «adam óltirýge oqtalý» babymen is qozǵaldy.

— Polıtsııa adam óltirýge oqtalý deregi boıynsha kúdiktini izin sýytpaı ustady. Qazir ol ýaqytsha ustaý ızolıatorynda. Tergeý amaldary jalǵasyp jatyr. Ózge málimet jarııalanbaıdy. Qylmystyq is departament basshylyǵynyń baqylaýynda, — dedi Qyzylorda oblystyq polıtsııa departamenti bastyǵynyń orynbasary Seıitmurat Tólepov. 

Kúdiktiniń aýyl mektebinde 20 jyldan astam ýaqyttan beri muǵalim bolyp jumys isteıtini anyqtaldy. Qylmys onyń úıinde bolǵan.

Japa shekken 1983 jylǵy kelinshek dereý jansaqtaý bólimine jetkizilgen. Jergilikti dárigerlerge oblys ortalyǵynan sanavıatsııamen áriptesteri baryp kómektesken. 

Aq halattylar áıeldiń áli beti beri qaramaǵanyn aıtyp otyr. 

— Jábirlenýshi ótken senbiden beri jansaqtaý bóliminde jatyr. Jaǵdaıy aýyr, qalypty. Oǵan polıtravma dıagnozy qoıyldy. Mıyna zaqym kelgen, saýsaqtaryn, bilegin shapqan. Basynan urǵan. Mańdaı súıegi, úsh saýsaǵy, shyntaq súıegi synǵan. Túsken boıda ota jasap, synyqtardy ornyna keltirdik. Aldaǵy ýaqytta jaq súıegine ota jasamaqpyz, — dedi Shıeli aýdandyq kópbeıindi aýrýhanasynyń bas dárigeri Almas Ábilpatta. 

Qylmystyń týyndaýyna qyzǵanysh, turmystyq janjal sebep bolýy múmkin degen boljam bar. Degenmen bul derek ázir rastalǵan joq. 

— Qyzylorda oblystyq polıtsııa departamentiniń otbasylyq-turmystyq zorlyq-zombylyqqa qarsy kúres bólimi tarapynan bul baǵyttaǵy profılaktıkalyq jumys úzdiksiz júrgizilip keledi, — delingen vedomstvonyń resmı jaýabynda. 

Aıta keteıik, kúdikti men jábirlenýshiniń bes balasy bar. 

Elimizde jyl saıyn polıtsııaǵa turmystyq zorlyq-zombylyq týraly 100 myńnan astam habarlama túsedi eken.