Áıelin aıaýsyz urǵan mańǵystaýlyq turǵynnyń bostandyqta júrgeni ras pa

ASTANA. KAZINFORM – Mańǵystaý oblysy Munaıly aýdanynyń turǵyny áıelin tún ortasynda qýyp júrip, sabap, múgedek qyla jazdaǵan. Іstiń mán-jaıyn Іshki ister mınıstrliginen suraǵan edik.

«Qazirgi ýaqytta azamatqa qatysty Ákimshilik quqyqbuzýshylyq týraly kodekstiń 73-1 baby 1-1 bóligine sáıkes ákimshilik hattama toltyryldy. Sonymen qatar, aıyptynyń áıelin uryp-soǵý arqyly keltirgen dene-jaraqatynyń dárejesin anyqtaý maqsatynda sot medıtsınalyq saraptama taǵaıyndaldy», - delingen agenttik joldaǵan saýal jaýabynda.

Sondaı-aq, aqparatta saraptamanyń qorytyndysy daıyn bolǵan soń, is sheshim qabyldaý úshin Munaıly aýdany sotyna joldanatyny aıtylǵan.

Eske sala keteıik, mańǵystaýlyq turǵyn ákesin jazaǵa tartýdy suraǵan edi.

Onyń aıtýynsha, ákesi ishimdik iship alyp, anasyn aıaýsyz urǵan. Al polıtsııa bolsa, ony 2 saǵattan keıin bosatyp jibergen. Osy oraıda Іshki ister mınıstrliginen aıyptyny nelikten bosatyp jibergenin jáne nege qamaýǵa alynbaǵanyn suraǵan edik, biraq vedomstvodan jaýap bolmady.

Aıta ketsek, ІІM-niń málimetinshe, agressorǵa ákimshilik hattama toltyrylǵan, al Mańǵystaý oblystyq Polıtsııa departamenti bergen aqparda kináliniń ákimshilik jaýapkershilikke tartylǵany aıtylǵan, biraq naqty qandaı jaza ekeni belgisiz.