Áıelim stýdent bolǵasyn dekretke shyqtym – Shalǵyn Áýzaıtpen suhbat
ASTANA. KAZINFORM – Qazaqstan Respýblıkasynyń Eńbek kodeksiniń 99-babyna sáıkes elimizde ákeler de bala úsh jasqa tolǵanǵa deıin dekrettik demalysqa shyǵa alady. Mundaı demalysta bolǵan kezeń eńbek ótiline saı tolyqtaı esepteledi.
– Júktilikke jáne bosanýǵa baılanysty demalystan basqa, qalaýynsha bala 3 jasqa tolǵanǵa deıin onyń kútimine baılanysty jalaqysy saqtalmaıtyn demalys berilýi múmkin. Kodekstiń 99-babyna sáıkes, osyndaı demalysty balanyń anasy nemese ákesi ala alady, al bala ata-ananyń qamqorlyǵynsyz qalǵan bolsa, jaqyn týysyna, ıaǵnı balany is júzinde tárbıeleıtin adamǵa beriledi, - delingen elektrondy úkimet portalynda.
Dekrettik demalysqa shyqqan ákelerdiń biri – Shalǵyn Áýzaıt. Ol stýdent jarynyń sabaǵyna kedergi keltirmes úshin balaǵa qaraý jaýapkershiligin óz moınyna alǵan.
– Men Ulpanǵa úılengennen keıin ony birden qoldap, óziniń qalaýy boıynsha vızajıstik bet árleý mamandyǵyn oqyttym. Sol arqyly úlken jetistikterge jetti. Ol ýaqytta ózim bala qarap, dekrette otyrdym. Bul – úlken tarıh boldy. Men ol kezde nege shyqtym? Óıtkeni, Ulpan stýdent boldy. Ulpannyń shákirtaqysy túkke jetpeıdi. Al meniń alatyn aılyǵym 100 myńǵa jeter-jetpes. Al bizdiń otbasymyzda tutynatyn zattarymyzǵa ketetin shyǵyn óte joǵary boldy. Sondyqtan men Ulpanǵa úıdegilerdi asyraý kerek dep aıttym. Men dekretke shyǵyp, odan qansha aqsha túsetinin kóreıin dedim. Solaı, Ulpan bosanardan aldyn, 9 aı bolǵan shamasynda ótinish bildirdim, - deıdi Jibek Joly arnasynyń «Búgin LIVE» baǵdarlamasyna suhbat bergen kásipker.
Kásibimen qosa blogyn da qatar alyp júretin áke kópshilikke «Dekretke shyqqan erkek» retinde jaqsy tanys. Shalǵyn Áýzaıt ózin kóshede kórip, kúlip jatatyndardyń baryn jasyrmady.
– Qazir kóshede ketip bara jatsam, kezikken adamdardyń bári maǵan dekretke shyqqan jigit dep kúlip aıtyp jatady. Bul – endi otbasym úshin jasaǵan áreketim ǵoı. Biraq men barlyǵyna dekretke shyǵyp ketińder dep aıta almaımyn. Óıtkeni, keıbir mekemeler dekretke shyǵarmaıdy. Al barsha dekretke shyǵamyn degen kisilerge aıtqym keletini – otbasylyq jaǵdaıǵa qarańyz, jaryńyzǵa qarańyz. Bizdiń otbasymyzda, bizdiń áýletimizde, mennen burynǵy ótken atalarymnan qalǵan tárbıe, otbasydaǵy áıel adamǵa, názik jandylarǵa degen kózqarasymyz, qurmetimiz múlde bólek, - deıdi ol.
Aıta keteıik, sáýir aıynan bastap dekrettik tólemderge shekteý engizildi.