Áıeliniń kóńildesin óltirgen er adam 9 jylyn SQO-daǵy kolonııada ótkizedi
PETROPAVL. QazAqparat – Soltústik Qazaqstan oblysyndaǵy ES-164/3 mekemesinde jazasyn ótep jatqan er adam áıeliniń kóńildesin óltirgenine ókinedi. Qyzǵanyshqa salynyp, adam qanyn moınyna júktegen oǵan 9 jylǵa jaza kesilgen, dep habarlaıdy QazAqparat tilshisi.
SQO boıynsha qylmystyq-atqarý júıesi departamenti baspasóz qyzmetiniń málimetinshe, Kırıll esimdi er adam áıeliniń kóńildesin óltirgeni úshin ES-164/3 mekemesinde jazasyn ótep jatyr. Bolǵan oqıǵany oı tezine salǵan ol búginde istegen isine qatty ókinedi.
Olıa men Andreı bir-birine mektepte oqyp júrip, ǵashyq bolady. 2,5 jyldaı juptary jazylmaǵan qyz ben jigittiń mektep bitirisimen joldary eki aıyrylady. Eki qalaǵa joǵary oqý ornyna túsken olar sol jaqta shańyraq kóteredi. Andreı kóp uzamaı áıelimen aırylysyp ketedi. Olıanyń da baqyty baıandy bolmaı shyǵady. Kúıeýi ishkilikke salynady.
Olıa men Andreı kezdeısoq kezdesedi. Er adam jumys babymen jaqynda kóship kelgen eken. Burynǵy mahabbattary qaıta tutanyp, ekeýi Olganyń kúıeýinen jasyryn kezdese bastaıdy.
«Araqty qoıyp, jumysqa ornalastym. Jaǵdaı túzelip kele jatqandaı bolyp edi. Biraq, áıelimniń sýynǵanyn sezdim. Sebebin keıin bildim ǵoı.
Úıge ádettegiden erte keldim. Olgany kóńildesimen kórgende qyzǵanyshtan órtenip kete jazdadym. Aqylymnan aljasqandaı boldym», - deıdi Kırıll.
Áıeliniń kóńildesin pyshaqtaǵan Kırıldi sot 9 jylǵa sottady.
«Áıelimmen betin ashyp sóılespedim. Birge tura almasaq ajyrasýǵa bolar edi. Iıa, men kinálimin, biraq áıelimdi de aqtamaımyn. Qandaı másele bolsa da erli-zaıypty ashyq sóılesýi qajet, sol kezde ony ýshyqtyrmaı sheshýge bolady», - deıdi Kırıll.
ES-164/3 mekemesinde Kırıll jańadan «gazelektrdánekerleýshi» mamandyǵyn aldy, jumyspen qamtylǵan.
