Áıeliniń basyn baltamen jarǵan túrkistandyqqa sot úkimi shyqty
TÚRKІSTAN. QazAqparat – Túrkistan oblysynda áıelin baltamen uryp, aýyr jaraqat salǵan er adam 11 jylǵa sottaldy, dep habarlaıdy QazAqparat polisia.kz saıtyna silteme jasap.
Eske sala keteıik, bıylǵy 27 aqpanda, tańǵy saǵat 9:40-ta Keles aýdandyq polıtsııa bólimine aýdan kósheleriniń birinde belgisiz áıeldiń jaraqattanyp jatqany týraly habar túsken bolatyn. Polıtseıler birden isti ashýǵa baǵyttalǵan tekserý sharalaryna kirisip, sol aýmaqty tyńǵylyqty tekserdi. Kýágerlerden jaýap alyndy. Sonymen qatar oqıǵa ornynan aıǵaqty zat retinde balta tárkilendi.
Aýyr jaraqat alǵan áıel densaýlyǵyna baılanysty shaǵymdana almaǵann soń, onyń ápkesi polıtsııa bólimine kelip aryzdandy. Aryz QR QK-niń 24-99-baby «Adam óltirýge oqtalý» boıynsha sotqa deıingi tergep-tekserýdiń biryńǵaı tizilimine engizip, tergeý júrgizildi.
«Jedel izdestirý sharalarynyń nátıjesinde, kúdikti retinde zardap shekken áıeldiń kúıeýi 2-3 saǵat ishinde aýdan kósheleriniń birinen ustaldy. Tergeý barysynda belgili bolǵandaı, kúdikti men áıeliniń arasynda otbasylyq janjal týyndaǵan jáne bul, erli-zaıyptylar arasyndaǵy alǵashqy kıkiljiń bolmaǵan. Buǵan deıin de birneshe ret qaıtalanǵan. Al dál osy jaıt kezinde kúıeýi áıeldi uryp soǵyp, oǵan baltamen umtylǵan. Záresi ushqan áıel qasha jóneledi. Alaıda, kúıeýi artynan qýyp jetip, qolyndaǵy baltasymen ony aıaýsyz soqqan. Búgingi tańda zardap shekken áıel emhanaǵa qaralyp, tıisti otasy jasaldy. Alaıda betine tıgen baltanyń saldarynan bir kózi qatty zaqymdanyp, bir jaǵynan bas jaraqatyn alǵan», - delingen aqparatta.
Málim etilgendeı, qazirgi ýaqytta áıeldiń jaǵdaıy birqalypty. Ol Shymkent qalasyndaǵy týystarynyń úıinde. Taǵy bir ota jasaýǵa daıyndalýda.
Túrkistan oblystyq sotynyń sheshimimen kúdikti 11 jyl 3 aıǵa bas bostandyǵynan aıyryldy.
