Áıeline 24 jerden pyshaq salǵan qostanaılyq 9 jylǵa sottaldy
ASTANA. QazAqparat - Qostanaı oblysynyń qylmystyq is boıynsha mamandandyrylǵan aýdanaralyq soty «Kisi óltirý» babymen sottalǵan 35 jastaǵy Dmıtrıı Semenovke qatysty úkim shyǵardy. Ol áıeldiń denesine 24 ret pyshaq salǵan, dep habarlady alau.kz.
Іs materıaldary boıynsha, Semenov pen Fedotova azamattyq nekede ómir súrgen jáne ortaq kishkentaı uly bolǵan. Jıi bolatyn urys-keristen jas áıel anasynyń úıine kóship ketken. Úsh apta boıy Semenov áıeline baryp, úıge qaıtyp kelýin ótinedi. Áıel basqa adamdy jolyqtyryp, odan qashqaqtaı bastaıdy.
«8 maýsym kúni Semenov azamattyq nekedegi áıeliniń kezdesip júrgen jigitin taýyp, jolyqqan. Áńgime barysynda janjal týyp, tóbeles bolǵan. 11 maýsym kúni sottalýshy burynǵy áıeline habarlasyp, onyń týǵan kúnin toılaý úshin úıine shaqyrǵan. 5 myń teńge syılaǵan. Sol kúni Semenovta qaıtadan tatýlasamyz degen úmit paıda bolady. Alaıda, Fedotova onymen týǵan kúnin toılaýdan bas tartyp, qurbysyna qonaqqa ketedi», - delingen oblystyq sot baspasóz qyzmetiniń aqparatynda.
Sol kúni túngi 23:30 shamasynda Semenov Fedotovany podez mańynda kútip alǵan jáne ózge er adammen qarym-qatynasyn úzýdi talap etip, qaıtadan qosylýdy ótingen. Áıel bas tartyp, urys-keris týyndaǵan. Ashýlanǵan jáne renjigen Semenov áıeldi shalqasynan qulatyp, pyshaqty suqqylaı jónelgen. Fedotova oqıǵa ornynda jan tapsyrǵan.
Sot Semenovty aıypty dep tanydy jáne qatań rejım kolonııasynda 9 jylǵa bas bostandyǵynan aıyrý týraly jaza taǵaıyndady.
