Áıelin pyshaqtap óltirgen elorda turǵyny ustaldy
NUR-SULTAN. QazAqparat – Polıtsııa qyzmetkerleri áıelin óltirgen er adamdy izin sýytpaı ustady, dep habarlaıdy QazAqparat Nur-Sultan qalalyq polıtsııa departamentiniń baspasóz qyzmetine silteme jasap.
28 sáýir saǵat 14.31-de «102» nómirine qońyraý shalynyp, Táýelsizdik kóshesindegi turǵyn úılerdiń satysynda pyshaqtalǵan áıeldiń denesi jatqany týraly habarlandy. 1982 jylǵy Beloýs Nadejda qalalyq aýrýhanaǵa jetkizilip, saǵat 16:10-da alǵan jaraqatynan qaıtys boldy.
Polıtsııa qyzmetkerleri áıeldiń kúıeýi - 1992 jyly dúnıege kelgen Beloýs Rostıslavty izin sýytpaı ustady. Atalǵan faktimen QR Qylmystyq kodeksiniń 99-baby boıynsha qylmystyq is qozǵaldy. Kúdikti azamat ýaqytsha qamaldy.
«Qylmysqa erli-zaıyptylar arasyndaǵy qyzǵanysh sebep bolǵan. Bul jup 2017 jyly úılengen, biraq 2020 jyldyń basynan beri birge turmaǵan. Ekeýi áıeldiń birinshi nekesinen týǵan 2011 jylǵy bala men 2018 jyly dúnıege kelgen ortaq balany tárbıelegen. Qazirgi kezde kámelet jasyna tolmaǵan balalar ólgen áıeldiń ápkesiniń qolynda» delingen PD baspasóz qyzmetiniń habarlamasynda.
Polıtsııa departamentiniń málimetinshe, bul - karantın kezeńinde bolǵan otbasylyq-turmystyq qatynas salasynda jalǵyz asa aýyr qylmys.
