Áıelin ózge dinge kirgen dep pyshaqtaǵan shymkenttik sottaldy
ShYMKENT. QazAqparat - Ońtústik Qazaqstan oblysynda áıelin ózge dinge kirgeni úshin pyshaqtaǵan turǵyn sottaldy, dep habarlaıdy QazAqparat tilshisi.
Qarataý aýdandyq soty Haırolla Narmetovty Qylmystyq kodekstiń 106-baby 1-bóligi («Qasaqana aýyr dene jaraqatyn salý») boıynsha kináli dep tanyp, úsh jylǵa bas bostandyǵynan aıyrdy.
Aıta keteıik, sottyń sońǵy otyrysynda aıyptalýshynyń áıeli Ýmıda Narmetova ózine pyshaq jaraqatyn salǵan kúıeýin perzentteri úshin keshiretinin aıtqan bolatyn.
Óz kezeginde sottalýshynyń ózi jasaǵan áreketine ókinetinin jetkizdi. Ári áıeli men onyń anasynan keshirim surady. Alaıda Qarataý aýdandyq sotynyń sýdıasy Ermahan Rahmanberdi pyshaq salǵan turǵynǵa túzeý mekemesinde jazasyn óteý týraly úkim shyǵardy.
Eske salaıyq, Saıram aýdanynyń turǵyny Haırolla Narmetov áıelin pyshaqtap tastaǵan soń, qanǵa boıalǵan pyshaǵyn kórsetip áleýmettik jelige salǵan edi. Ol tipti «áıelimdi basqa dinge ótkeni úshin óltirdim» dep málimdegeni belgili. Osydan keıin aýyr jaraqat alǵan áıeli aýrýhananyń jansaqtaý bólimine túsip, aman qaldy.
