Áıelin óltirmek bolǵan aqtóbeliktiń isi sotqa jiberildi
Aqtóbe qalasy Almaty aýdandyq prokýratýrasy óz áıeline qastandyq jasap, keıin tergeý ızolıatorynan qashyp ketken kúdiktige qatysty isti tergep, keıin sotqa jiberdi.
«Prokýrordyń aıyptaý aktisine súıensek, kúdikti ishimdik iship, áıeline birneshe ret pyshaq suǵyp alǵan. Keıin osy pyshaqpen óz-ózine qol jumsamaq boldy. Alaıda oǵan jedel medıtsınalyq járdem kórsetilip, kúdikti oıyna alǵan isin aıaqtaı almady. Keıin tergeý ızolıatoryna otyryp, taǵy óz denesin jaralap, jedel járdem aýrýhanasynyń mamandandyrylǵan palatasyna jatqyzyldy. Sol jerden qashyp ketip, qolǵa tústi», - dep habarlady Aqtóbe qalasy Almaty aýdanynyń prokýrory Jasulan Dáýlembaev.
Aıta keteıik, bıyldan bastap úsh býyndy model qoldanysqa engizildi. Talap boıynsha prokýrorlar tergeý dáleldemelerine súıene otyryp asa aýyr qylmystyq isterdiń aıyptaý aktisin jazady.