Áıelin qyzynyń kózinshe pyshaqtaǵan almatylyqqa sot úkimi shyqty

ALMATY. QazAqparat - Almatyda bes jasar qyzynyń kózinshe áıeline pyshaqpen shabýyl jasaǵan er adam úsh jylǵa sottaldy, dep habarlaıdy QazAqparat tilshisi.

Almaty qalasy Bostandyq aýdanynyń № 2 sotynda Qazaqstan Respýblıkasy Qylmystyq kodeksiniń 106-babynyń 1-bóligimen densaýlyqqa qasaqana aýyr zııan keltirý faktisi boıynsha is qaraldy.

Sotta anyqtalǵandaı, sottalýshy V. áıeli ózine opasyzdyq jasady degen kúdikpen, onyń densaýlyǵyna qasaqana aýyr zııan keltirip, denesine pyshaq jaraqattaryn salǵan. Sodan keıin jedel járdem shaqyryp, oqıǵa ornynan qashyp ketken.

Sotta memlekettik aıyptaýshy sottalýshyny 3 jyl 6 aıǵa bas bostandyǵynan aıyrýdy surady, zardap shekkender prokýrordyń ustanymymen kelisti.

Sot úkimimen V., densaýlyqqa qasaqana aýyr zııan keltirgeni úshin kináli dep tanylyp, 3 jyl bas bostandyǵynan aıyrý túrindegi jaza taǵaıyndaldy. Ol jazasyn qylmystyq-atqarý júıesiniń ortasha qaýipsiz mekemesinde óteıdi. Sondaı-aq sottalýshydan 2 mln teńge moraldyq shyǵyn ishinara óndirildi.

Úkim zańdy kúshine engen joq.

Byltyr qarasha aıynda Almaty turǵyny Irına Vedenıapına bes jasar qyzynyń kózinshe jubaıynyń pyshaqpen shabýyldaǵany týraly Instagram paraqshasyna jazǵan bolatyn.