Áıelin qyzǵanǵan ǵalym ý bergen
ASTANA. 26 shilde. QazAqparat - Amerıkalyq neırobıolog Robert Ferrantege adam óltirdi degen aıyp taǵyldy.
Tergeý boljamy boıynsha Pıttsbýrsk ýnıversıtetiniń ǵalymy óz áıeline ý ishkizgen. Bul týraly RosBıznesKonsaltıng jazady
Ǵalymnyń áıeli Otomn Kleın 17 sáýir kúni aýrýhanaǵa túsip, úsh kúnnen keıin jan tapsyrdy. Onyń aǵzasynan tsıanıd tabylǵan. Tergeý jumystary kezinde áıel uıyqtar aldynda ishken kreatın sýsynyna ý qosylǵany belgili boldy.
Atalmysh jaǵdaı boıynsha qaza tapqan áıeldiń kúıeýine kúdik tústi. R. Ferrante qaıǵyly oqıǵaǵa deıin 2 kún buryn tsıanıd satyp alyp, nesıelik kartamen esep aıyrysqan. Ol ýdyń satyp alynýyn ǵylymı maqsattarmen túsindirgenimen, ǵalymnyń birde-bir zertteýine tsıanıdti qoldaný qajetti týyndamaǵan.
Tergeý barysynda erli-zaıyptylar arasynda kelispeýshilikter oryn alǵany anyqtaldy. O. Kleın aqpan aıynda dostaryna ajyrasatynyn aıtqan. Kúıeýin qyzǵanysh sezimi tumshalaǵan kórinedi. Bul ǵalymdy áıelin óltirýge ıtermeleýdiń basty sebebi bolýy yqtımal.
