Áıelin 41 ret pyshaqtap óltirgen aqtóbelikke sot úkimi shyqty
AQTÓBE. QazAqparat - Aqtóbelik Denıs Kýrash áıelin 41 ret pyshaq salyp óltirgen.
Keıin denesin tósenishke orap, aýla ishindegi dárethanaǵa laqtyryp jibergen. Sot ony 17 jylǵa bas bostandyǵynan aıyrý týraly úkim shyǵardy, dep habarlaıdy QazAqparat tilshisi.
Denıs Kýrash Aqtóbe oblysy, Mártók aýdanynyń týmasy. Ol jubaıy Oksanamen birgen Aqtóbe qalasyndaǵy jer úılerdiń birinde páter jaldap turǵan. Іs materıaldaryna súıensek, ótken jyldyń qarasha aıynda Denıstiń inisi qaıtys bolǵan. Denıs pen Oksana jerleý rásiminen soń úılerine kelip, ishimdik ishedi. Sol kezde ekeýi janjaldasyp, eri áıelin urýǵa kóshken. Keıin qolyna pyshaq alyp, áıeliniń ótinishine qaramastan denesine jaraqattar sala bastaǵan. 41 ret pyshaq suǵyp, artynsha moınynan baýyzdaǵan.
Denıs Kýrash sot otyrysy kezinde kinásin tolyq moıyndady. Jubaıyn óltirgennen keıin múrdesin tósenishke orap, aýla ishindegi dárethanaǵa tastaǵanyn aıtty. Oksananyń denesin týystary men páter ıesi tapqan. Denıs Kýrash áıelin óltirgen soń artynan eshqandaı da iz qaldyrmaı, bólme ishin jınap, jýyp, tazalap qoıǵan eken.
Sýdıa Nurlan Sultanov sottalýshy Denıs Kýrashqa 17 jylǵa bas bostandyǵynan aıyrý jazasyn taǵaıyndady. Sonymen qatar, túrme ishinde ony maskúnemdikten májbúrli túrde emdeıtin bolady.
