Áıelin 22 jerinen pyshaqtaǵan erkek sotta kóz jasyna erik berdi
TALDYQORǴAN. QazAqparat - Almaty oblysynda óz áıelin aıýandyqpen óltirgen Azamat Qulymbetovtiń sot protsessi jalǵasýda. Búgingi sot otyrysynda kúdikti sýdıanyń aldynda kóz jasyna erik berdi. Áıelimen «ajyrasqym kelmegen» dep aqtaldy, dep habarlaıdy QazAqparat tilshisi.
Azamat Qulymbetov aýyr qylmysqa kózine shóp salǵan áıelin qyzǵanǵandyqtan bardym dedi. Alaıda marqummen birge istegen áriptesteri Janardyń jýas, eńbekqor, ári adal áıel bolǵanyn aıtyp, marqumnyń arýaǵyn qorlamaýdy surady.
Uzynaǵash aýylynyń turǵyny, 34 jasar Azamat Qulymbetovtiń feldsherlik orta bilimi bar eken. Alaıda, marqumnyń týystary ony mamandyǵy boıynsha uzaq jumys istemedi, keıingi jyldary tek áıeliniń tapqanyna qarap otyrdy deıdi. Sot barysynda erkektiń araqqa qumar ekendigi ári áıeline buryn da qol kótergeni aıtyldy. Al qańtardyń biri kúni jastardyń eki bólmeli úıi tutastaı órtenip ketken. Marqumnyń týystary órtti araqqa sylqııa toıyp alǵan kúıeý balasy jasady degen oıda. Órtten keıin joldasynyń qorlyǵynan sharshaǵan Janar ajyrasýǵa bel býǵan eken. Biraq, arty qaıǵymen aıaqtaldy. Kúıeýi jumys ornyna kelip, áıelin aıaýsyz pyshaqtaǵan. Qorǵansyz áıeldiń pyshaq kirmegen saý jeri qalmaǵan, sońǵy ret kúıeýi sýyq qarýdy moıyn tusyna tyǵyp, ózi oqıǵa ornynan boı tasalaǵan. Janar Nasyrova aýyr jaǵdaıda Almatydaǵy №7 qalalyq aýrýhanaǵa jetkizilgen, alaıda 3 ota jasalsa da dárigerler onyń ómirin saqtap qala almady.
Esterińizge sala keteıik, qandy oqıǵa bıyl 18 aqpanda Qarasaı aýdanyndaǵy «Asyl arman» turǵyn úıleriniń birinde ornalasqan dárihana ishinde bolǵan. 1983 jylǵy Azamat Qulymbetov áıeliniń jumys ornyna kelip, ony aıaýsyz pyshaqtap, óltirgen jáne onyń bul áreketi beınekameraǵa túsken. Al qaza tapqan 33 jastaǵy Janar Nasyrovanyń artynda eki balasy qaldy. Protsess Qarasaı aýdandyq sotynda ótýde. Kúdikti Azamat Qulymbetov «Adam óltirý» baby boıynsha aıyptalyp otyr.
