Áıelimen janjaldasqan atyraýlyq baldyzynyń úıin órtep jiberdi
ATYRAÝ. QazAqparat - Jubaıymen janjaldasqan atyraýlyq azamat baldyzynyń úıin órtep jiberdi, dep habarlaıdy «QazAqparat» HAA tilshisi.
«Atyraý qalalyq №2 soty turmystyq janjaldan keıin óziniń baldyzynyń úıin órtep jibergen azamat B.-ǵa qatysty qylmystyq isti qarady. Sot materıaldarynda kórsetilgendeı, araqqa toıyp alǵan B. sińlisiniń úıine qonaqqa ketken áıelin izdep barady. Ol jerden jubaıyn tappaǵan soń ol áıeliniń telefonyna ózin-ózi órteıtini týraly habarlama jibergen. Alaıda mas jigit ózine emes baldyzynyń úıin ot qoıady. Saldarynan 4 774 009 teńge zııan keltirdi»,-dep habarlaıdy sottyń baspasóz qyzmeti.
Shyǵynnyń ornyn toltyryp, jábirlenýshiden keshirim suraýyna baılanysty sot atyraýlyq azamatqa 5 jylǵa shartty túrde bas bostandyǵyn shekteý týraly úkim shyǵardy.
