Áıelimen ajyrasqan frantsııalyq Uber kompanııasynan 45 mln eýro talap etti
ASTANA. QazAqparat - Frantsııalyq kásipker udaıy taksı qyzmetin paıdalanyp, óziniń kóńildesine baryp júrgenin jubaıy baıqap qalǵan soń Uber kompanııasyn sotqa berdi, dep habarlaıdy Bı-bı-sı.
Ata-jóni belgisiz azamat birshama ýaqyttan beri Frantsııanyń ońtústigindegi ózi turyp jatqan qalada turatyn kóńildesine turaqty túrde baryp júrgen jáne ol úshin qandaı da bir kedergilerdi de kezdestirmegen.
Eger ol áıeliniń uıaly telefonynan taksı shaqyrmaǵanda oqıǵa osylaısha órbı berýi de múmkin edi. Ol óziniń akkaýntyndaǵy siltemeni ashyp, taksı shaqyrǵan soń ol jerden shyǵyp ketken. Alaıda taksı qyzmetininiń bagy kúıeýiniń qaıda júrgeni týraly habarlamany kelinsheginiń uıaly telefonyna qaıta-qaıta jibere bergen.
Sodan beri otbasyly ekeý bir-birimen ajyrasyp, bólek turady. Alaıda, kúıeýi ózi tap bolǵan baqytsyzdyqqa taksı kompanııasynyń qyzmetin kinálap, uıymdy sotqa berdi jáne ózin osyndaı jaǵdaıǵa jetkizgeni úshin uıym ókilderinen 45 mln eýro talap etti.
«Meniń klıentim siltemedegi bagtyń qurbanyna aınaldy»,-dep málimdedi kásipkerdiń advokaty Davıd-Andre Darmon Frans press agenttiginiń tilshisine bergen suhbatynda.
«Osyndaı kemshiliktiń saldarynan bireýdiń taǵdyry tálkekke ushyrady»,-dedi Darmon. Ol Figaro basylymy jarııalaǵan aıypypul qunyn rastaǵan joq.
Figaro basylymynyń jazýynsha, Frantsııa azamatynyń áıelinen ajyraýyna sebep bolǵan bagty kompanııa ókilderi joıǵan.
