«Áıelim dertke ushyrady»: Óskemen turǵyny alaıaqqa 2 mln teńge bergen

ÓSKEMEN. QazAqparat – Óskemen qalasynyń turǵyny alaıaqqa aldanyp, 2 mln teńgesinen aıyrylǵan, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, Óskemendegi polıtsııa bólimsheleriniń birine 31 jastaǵy er adam júgingen. Óz sózinde ol alaıaqtyń arbaýyna túsip, 2 mln teńge shyǵynǵa batqanyn jetkizdi.

Belgili bolǵandaı, jábirlenýshini sózge tartqan tanysy aýyr dertke ushyraǵan áıeline shuǵyl túrde ota jasatý qajettigin aıtqan. Buǵan sengen azamat áýelde 500 myń teńge berdi. Keıin taǵy 1,5 mln teńge somasyna nesıe resimdep, alaıaqtyń qolyna ustatqan.

«Jedel izdestirý-sharalaryn júrgizgen polıtseıler kúdiktini qolǵa túsirdi. Ol buryn sottalmaǵan, jumyssyz, 32 jastaǵy jergilikti turǵyn bolyp shyqty. Atalǵan fakti boıynsha QR QK-niń 190-baby 1-bóligine (Alaıaqtyq) sáıkes sotqa deıingi tergeý amaldary bastaldy», - deıdi oblystyq PD bastyǵy Saǵat Mádıev.