Áıeldiń qyzymen birge 3-qabattan sekirý oqıǵasy: Sot polıtseılerge úkim shyǵardy
ASTANA. QazAqparat - Ótken jyldyń qazan aıynda Aqtaýda qyzymen birge úshinshi qabattan jastyq qushaqtap sekirip ketken áıeldiń isine qatysty sot protsesi aıaqtaldy, dep habarlaıdy QazAqparat tilshisi.
2017 jyly 17 qazan kúni keshke qaraı 11-yqshamaýdandaǵy 29-úıdiń túbinde es-tússiz jatqan áıel men jas qyzdy turǵyndar baıqap qalyp, jedel járdem shaqyrǵan. Málim bolǵandaı, ústinen urlyq faktisi boıynsha is qozǵalǵan azamatshany Shymkent qalasy ІІB-niń eki qyzmetkeri Aqtaýda júrgen jerinen ustap, alyp ketpek bolǵan. Ol qyzymen birge polıtseılerden qashyp, páter terezesinen sekirip ketken. Osy oqıǵaǵa qatysty polıtseılerdiń ústinen is qozǵalǵan bolatyn.
Mańǵystaý oblysy Aqtaý qalalyq sotynda qoǵamnyń narazylyǵyn týdyrǵan qylmystyq is boıynsha Shymkent qalasy ІІB-niń eki qyzmetkerine qatysty úkim jarııalandy.
Sotta anyqtalǵandaı, Shymkent qalasy ІІB-niń eki qyzmetkeri Ońtústik Qazaqstan oblysy Іshki ister bóliminde Qylmystyq Kodekstiń 188-babynyń 3-bóligimen qozǵalǵan qylmystyq is boıynsha kúdikti azamatshany Shymkent qalasyna jetkizý maqsatynda Aqtaý qalasyna issaparmen kelgen. Olar kúdikti men onyń kámeletke tolmaǵan qyzyn taýyp, ushaqpen jolǵa shyqqanǵa deıin qala ortalyǵyndaǵy páterge ornalastyrǵan.
Kúdikti polıtsııa qyzmetkerleriniń áreketterinen jáne jaýapkershilikke tartylý qaýpinen qorqyp, qyzymen birge 3-qabattaǵy páterdiń terezesinen sekirip ketken. Keıin Mańǵystaý oblystyq aýrýhanasyna jetkizilgen.
Sot-medıtsınalyq saraptamaǵa sáıkes, kúdiktiniń densaýlyǵyna ortasha dárejede zııan keltirilgen.
Sot talqylaýy barysynda polıtsııa qyzmetkerleriniń kúdikti men onyń kámeletke tolmaǵan qyzyna fızıkalyq jáne psıhıkalyq qysym kórsetpegeni dáleldendi. Kúdikti sotqa qatysýdan bas tartyp, jazbasha bergen aryzynda ózine eshqandaı kúsh kórsetilmegenin, májbúrlep tergeýge jetkizý týraly qaýlymen tanysqan soń, jaýapqa tartylýdan qorqyp, qashýǵa oqtalǵanyn, ózderiniń abaısyzdyqtarynan dene jaraqattaryn alǵandaryn kórsetken.
Іs qujattaryna sáıkes kúdiktige qatysty 2017 jyly Almaty jáne Shymkent qalalarynda qylmystyq ister qozǵalǵan.
Sot eki polıtsııa qyzmetkerlerine qatysty Qylmystyq Kodekstiń 362-babynyń 2-bóligimen taǵylǵan aıyp tolyq dálelin tappaǵandyqtan, olarǵa qatysty aqtaý úkimin shyǵardy.
Aqtaý úkimi zańdy kúshine engen joq.
