Áıeldiń qoǵamdaǵy ornyn jete túsinip, úlken qurmet kórsetip otyramyz - B.Atamqulov
ASTANA. QazAqparat - 8 naýryz - Halyqaralyq áıelder kúni merekesine oraı oblys ákimi B.Atamqulov ardaqty analar men aıaýly arýlardy quttyqtady, dep habarlaıdy ákimdiktiń baspasóz qyzmeti.
«Merekelik jıynǵa qoǵamnyń damýy men Táýelsiz elimizdiń demografııalyq ósimine úles qosyp júrgen kóp balaly analar, ulaǵatty ustazdar men bilikti dárigerler, bıznes bastap, kásipten násip tapqan kásipkerler men qalamy qarymdy jýrnalıst hanymdar jınaldy. Sulý da tabysty qyz-kelinshekterdi tól merekesimen quttyqtaǵan oblys ákimi olarǵa arnaıy syı-sııapat jasady», delingen habarlamada.
«Alyp ta, aqyn da - Anadan týady». Bul bizdiń dana halqymyzdyń sózi. Bárimiz Anadan týdyq. Ana - ómirdiń bastaýy, meıirimniń bulaǵy. Ár kúnimizde biz áıeldiń qoǵamdaǵy orny men rólin jete túsinip, úlken qurmet kórsetip otyramyz. Sizder, elimizdiń kórkeıýine belsene atsalysyp, barlyq salada abyroıly jumystaryńyzben kópshiliktiń qurmetine bólengen jandarsyzdar»,- dedi B.Atamqulov óz quttyqtaý sózinde.
Aıta keteıik, Ońtústik Qazaqstan oblysyndaǵy halyqtyń sany 2,8 adam bolsa 1,4 mln-y áıel azamattar. Olardyń ekonomıkalyq turǵydan belsendileri 73,3 paıyz. Búgingi tańda olar óńirimizdiń damýy úshin qoǵamymyzdyń túrli salalarynda eńbek etip keledi. Máselen, memlekettik qyzmet salasyndaǵy qyz-kelinshekterdiń úlesi 36,8 paıyz bolsa, bilim salasyndaǵy pedagogtardyń 73,2 paıyzy, densaýlyq saqtaý salasyndaǵy bilikti dárigerler men mamandardyń 86 paıyzy názik jandylardan turady.
Ońtústik Qazaqstanda ótken jyly 80 myńnan astam sábı týyp, 150 myńnan astam áıel kóp balaly ana retinde tirkelgen. Osy kúnge deıin jalpy oblysta olardyń 30 753-i Elbasy Jarlyǵymen «Altyn alqa» ıesi atanyp, 41 621-i «Kúmis alqa» belgisimen marapattalǵan.
