Áıeldiń basyn taspen urǵan: Almaty oblysynda tapa-tal túste adam tonaǵan kúdikti ustaldy
TALDYQORǴAN. QazAqparat - Almaty oblysynyń Eskeldi aýdanynda tapa-tal túste aýyr dene jaraqatyn salyp, adam tonaǵan kúdikti ustaldy, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 28-qyrkúıek kúni Eskeldi aýdanynda úıine kele jatqan jolda 52 jastaǵy áıelge belgisiz bireý shabýyl jasap, qolyndaǵy sómkesin alyp qashýǵa árekettengen. Oqıǵa saǵat 15:30 shamasynda bolǵan.
Sómkeni jibermeıtinin túsingen kúdikti aldyn-ala daıyndap alǵan taspen áıeldiń basynan soqqy jasaǵan. Degenmen, zardap shegýshi áıel ishinde qomaqty qarjysy bar qol sómkesinen aıyrylmaı, ózgelerdi kómekke shaqyrǵan. Kúdikti oqıǵa ornynan izin sýytýǵa tyrysqan.
«Kúdikti boı tasalaýǵa tyrysqanymen, kóshedegi kýáger azamattardyń kómegimen ustalyp, ýaqytsha ustaý oqshaýlaǵyshyna qamaqqa alyndy. Tekserý barysynda kúdiktiniń buǵan deıin adam óltirý, urlyq derekteri boıynsha birneshe márte sottalǵan 44 jastaǵy jergilikti turǵyn ekeni anyqtaldy. Oqıǵa ornynan kúdikti paıdalanǵan tas tárkilenip, is materıaldaryna aıǵaqzat retinde tirkeldi. Osy derek boıynsha QR Qylmystyq kodeksiniń baptaryna sáıkes, kisi tonaýǵa oqtalý deregi boıynsha sotqa deıingi tergeý amaldary júrgizilip jatyr»,- dedi Eskeldi aýdany Polıtsııa bóliminiń bastyǵy polıtsııa polkovnıgi Janat Qudaıbergenov.
Zardap shegýshi ózine jasalǵan shabýyl kezinde alǵan dene jaraqatymen dárigerlerdiń kómegine júgingen. Aldyn-ala tergeý barysynda kúdiktiniń ishimdikke sylqııa toıyp alyp, qylmys jasaǵany belgili boldy. Polıtseıler kúdiktiniń budan basqa da qylmystarǵa qatysy baryn tekserýde.
