Áıeldi zorlaǵan kúdikti tyrnaq egeýishtiń kómegimen tabyldy
TALDYQORǴAN. QazAqparat - Almaty oblysynda 37 jastaǵy áıelge zorlyq-zombylyq kórsetken kúdikti ustaldy. 1976 jylǵy azamatty polıtseıler 14 qańtar kúni qolǵa túsirdi, dep habarlaıdy QazAqparat tilshisi.
Oqıǵa Kóksý aýdanynyń Balpyq bı aýylynda bolǵan. Ótken jyldyń 19 qarashasy kúni oblys ortalyǵyna jumysqa bara jatqan áıeldi belgisiz er adam zorlap ketken. Qasqoı óziniń aram-pıǵylyn júzege asyrmaq bolyp, birneshe kún boıy jábirlenýshini ańdyǵan kórinedi. Sebebi, zorlaý faktisi tańǵy saǵat 5-6-lar shamasynda halyq kóp júrmeıtin jerde bolǵan. Qatty shoshynǵan áıel tártip saqshylaryna kúdiktiniń kelbeti jaıly tolyq aqparat bere almaǵan. Biraq jábirlenýshi ózin zorlaǵan qylmyskerdiń qolyn tyrnaq egeıtin quralmen jaraqattaǵanyn aıtqan.
«Jedel izdestirý barysynda Kóksý aýdanynyń polıtseıleri 1976 jylǵy kúdiktini ustady. Qolǵa túsken azamat áıeldi zorlaǵanyn moıyndady. Biraq onyń osy qylmysqa qatysy bar ekeni taǵaıyndalǵan saraptama barysynda anyqtaldy. Máselen, áıeldiń tyrnaq egeýishinde qalǵan er adamnyń qany jáne jábirlenýshiniń kıimine jaǵylǵan qan kúdiktige tıesili ekeni dáleldengen», - dep málim etti oblystyq ІІD baspasóz qyzmetinen.
Anyqtalǵandaı, kúdikti azamattyń otbasy joq. Osy aýylda turatyn týystarymen jaqyn aralaspaıdy. Zorlaý faktisi boıynsha QR QK 120-babyna sáıkes is qozǵalyp, tergeý jalǵasýda. Qazir kúdiktiniń ózge de qylmystarǵa qatysy bar-joǵy anyqtalýda. Al jábir kórgen 37 jastaǵy áıeldiń kámelettik jasqa tolmaǵan eki balasy bar.
