Áıeldi uryp-soǵyp, tonap ketken Kentaý turǵyny ustaldy
ASTANA. QazAqparat - Kentaý QІІB-nyń kezekshi bólimine aryzdanǵan 32 jastaǵy áıel shilde aıynda qaladaǵy kóshelerdiń birinde 25-30 shamasyndaǵy belgisiz azamat tap berip, ony uryp, baǵaly zattary bar sómkesin tartyp alyp ketkenin kórsetken. Atalǵan jaıt boıynsha QR QK-niń 191-shi «Tonaý» baby boıynsha Kentaý QІІB SDTBT-ne tirkeldi.
Bul týraly OQO ІІD Memlekettik til jáne aqparat basqarmasy habarlady.
Kentaý QІІB jedel-izdestirý is-sharalarynyń barysynda buryn sotty bolǵan, 1987 jylǵy jergilikti turǵyndy ustady. Aıǵaqty zattar retinde sómke jáne uıaly telefon tárkilenip alyndy. Tergeý barysy anyqtaǵandaı, 30 jastaǵy ustalǵan azamat qarsylyq kórsete almaıtyn álsiz áıeldi tonaýdy maqsat etken. Qurbanyna bas salyp, kúsh qoldanyp, baǵaly zattary men sómkesin alyp, oqıǵa ornynan boı tasalaǵan. Qazirgi tańda kúdiktiniń basqa da qylmystarǵa qatystylyǵy anyqtalý ústinde.
Kentaý qalasynyń polıtseıleri qala turǵyndaryna kósheler men qoǵamdyq oryndarda beıtanys azamattarmen tildeskende erekshe saq bolýyn eskertedi.
