Áıeldi tonaýshynyń oǵynan sómkesi qutqaryp qaldy
ASTANA. QazAqparat - Nıý-Iork qalasynda tonaýshy óz avtomobıliniń júk salǵyshyna zattaryn qoıyp jatqan 39 jastaǵy áıelge kenetten shabýyl jasaǵan.
Ol tapanshasymen qorqytyp kóliktiń kiltin suraǵan. Biraq áıel qarsylyq kórsetken kezde kúdikti qarýyn onyń keýdesine taqap turyp, atyp jibergen. Oq sómke men ámııannan ótip, kıimge turyp qalǵan. Buǵan jyny kelgen qaraqshy áıeldiń basynan tapanshamen uryp, kiltti alǵan da kólikke minip izin sýytqan, dep jazady New York Daily News.
Polıtsııa tonaýshyny qylmys ornynan alty shaqyrym jerden qolǵa túsirdi. Oǵan adam ómirine qastandyq jasaý, tonaý, zańsyz qarý ustaý, sondaı-aq qaraqshylyq maqsatta qarýdy paıdalaný boıynsha aıyp taǵyldy. Zardap shekken áıel aýrýhanaǵa jatqyzyldy.
