Áıeldi múıizine ilip laqtyrǵan: Almaty oblysynyń polıtseıleri sıyrdy atyp tastady
TALDYQORǴAN. QazAqparat - Almaty oblysynyń tártip saqshylary iri qara maldy atyp tastaýǵa májbúr boldy, dep habarlaıdy QazAqparat tilshisi.
Oqıǵa 18 sáýir kúni Jambyl aýdanynyń Qaınazar aýylynda bolǵan. Bordaqylanǵan sıyr qashyp ketip, aınalasyndaǵy adamdardyń ómiri men densaýlyǵyna qaýip tóndirgen. Aldynan kezdesken áıeldi múıizine ilip alyp, boıynan asyra laqtyryp jibergen. Buǵan polıtsııa qyzmetkerleri kýá bolǵan.
Tártip saqshylary zardap shegýshini jaqyn mańdaǵy medıtsınalyq pýnktke jetkizip, janýardy oqshaýlaý sharalaryn qabyldaǵan.
«Janýardy soıý maqsatynda semirtkeni anyqtaldy. Sıyrdy soıýǵa ákelgende, ol qashyp ketip, aınalasyndaǵy adamdardy qýalaǵan. Kóshede aýyl turǵyndary júrgen, arasynda balalar da boldy. Bosap ketken sıyr jolyndaǵy eki kólikti búldirip, shyǵyn keltirgen. Polıtseıler janýardy adam arasynan aýlaq alyp shyǵýdyń amalyn taýyp, mal ıesiniń ruqsatymen ony atyp tastady», - dep málimdedi Almaty oblystyq Polıtsııa departamentiniń baspasóz qyzmetinen.
Zardap shekken áıel adam jeńil dene jaraqatyn alyp, aýrýhanadan shyqty. Tártip saqshylary mal ıesinen oqıǵaǵa qatysty túsinikteme alyp, budan ári mal soıýdyń arnaıy oryndaryn paıdalaný qajettigi týraly eskertti.
«Oqıǵa ornyna kelgen aýdandyq mal dárigerleri janýardy qutyrý aýrýyna tekserip, qandaı da bir aýrýdyń belgilerin tappady»,- dep atap ótti vedomstvo ókilderi.
