Áıeldi ekinshi sorttaǵy adam sanaıtyn el emespiz - Nursultan Nazarbaev
«Qazirgi zamanda dinı ahýal ylǵı da kóz aldymyzda bolýy kerek. Sırııada bolyp jatqan, bizdiń ishimizde de bolyp jatqan jaǵdaılardy kórip otyrsyzdar. Áneý kúni barlyq moldalarmen kezdeskenimde ony aıtqanmyn. Jaqynda olardyń bas qosýy bolyp, jańadan múftı saılandy. Ol jerde de aıttym. Biz, qazaqstandyqtar, zııaly qaýymbyz, elmiz», - dedi Elbasy.
Qazaqstan Prezıdenti din máselesi memleketten bólek turatyndyǵyn atap ótti.
«Degenmen ony basqarmasa bolmaıdy. Sondyqtan ol jaqta ne aıtylyp jatqanyn, kim meshit salyp jatqanyn egjeı-tegjeıli bilip otyrý úshin mınıstrlik quryldy. Ákesiniń atynan meshit salady, onyń ishinde ne aıtyp jatqanyn eshkim bilmeıdi. Biz memleketpiz. Memleket bolǵannan keıin onyń barlyǵyn qadaǵalaýymyz kerek», - dedi Nursultan Nazarbaev.
Memleket basshysy qazaq áıelderi esh ýaqytta qara kıim kıip, tumshalanyp júrmegendigin basa aıtty.
«Áıelderdi ekinshi sorttaǵy adam sanaıtyn el emespiz. Ony da qaraý kerek. Saqaly beline túsken adamdardyń jalańaıaq shortymen júrgeni de bizge jaramaıdy. Dinde ata-babamyzdan qalǵan jolymyz bar. Sonymen júrýimiz kerek. Meniń aıtarym, barlyq memleketterde din jumysy memleket qolynda. Ol Túrkııada da, Saýd Arabııasynda da, naǵyz musylmanbyz degen arab elderinde de bar. Biz de qadaǵalap otyrýymyz kerek», - dedi Memleket basshysy.
Qazaqstan Prezıdenti búginde elimizde úsh myńǵa jaqyn meshit ashylǵandyǵyn eske saldy.
«Baram degeni barady, qaı dinge baratynyn ózi biledi. Degenmen, elimizde eshqandaı búlik salmaýy kerek. Basqa aǵymǵa, basqa sharýaǵa dindi buryp áketip, búlik shyǵaratyn terrorıster shyqpaýy tıis», - dep basa aıtty Elbasy.
