Áıeldi 35 jerinen pyshaqtap óltirip, kóligine tyǵyp qoıǵan aqtóbelikke úkim shyqty
Qylmystyq oqıǵa bıyl boldy. Buǵan deıin habarlaǵanymyzdaı, 1976 jyly týǵan aqtóbelik áıel 23 aqpan kúni jumysqa shyǵyp, úıine qaıta oralmaǵan.
Polıtsııa izdeý jumystarynan soń 29 jastaǵy kúdiktini ustady.
Ol áıeldi pyshaqtap óltirip, denesin eki kún boıy kóliginiń júksalǵyshynda saqtaǵan.
Oqıǵadan soń Qylmystyq kodekstiń «kisi óltirý» baby boıynsha is qozǵalyp, tergeý júrdi. Іs Aqtóbe oblystyq qylmystyq ister jónindegi mamandandyrylǵan aýdanaralyq sotynda qaraldy.
Memlekettik aıyptaýshynyń aıtýynsha, sottalýshy D. bıyl 15 aqpan kúni jábirlenýshimen saıt arqyly tanysqan.
Otbasynan ajyrasqanyn aıtqan. Al 21 aqpan kúni sottalýshy jeńil kólikti jalǵa alady.
Keıin jábirlenýshini kútip alyp, úıine jetkizip tastaıdy. Sol kúni telefon arqyly qaıta habarlasyp, jynystyq qatynasqa túsedi.
23 aqpan kúni saǵat 19:00-de kútip alyp, taǵy kezdesedi. Sol kezde sottalýshynyń anasy qońyraý shalyp, jigittiń uıaly telefonynyń betinde turǵan otbasy fotosy kórinedi.
Ekeýi sózge kelip, jábirlenýshi sońynda jasyryn araqatynas jaıynda áıeline aıtyp baratynyn jetkizgen.
«Sottalýshy osy sózden qorqyp, ashýǵa salynady. Kóliktiń aldyńǵy esigindegi tartpada turǵan pyshaqty alyp, kıinip jatqan jábirlenýshiniń keýde tusyna, qol-aıaǵyna jaraqat salyp, qınap, tunshyqtyrý úshin tamaǵyn, jelkesin birneshe ret keskileıdi. Tiri kezinde 35 kesip-tesilgen dene jaraqatyn keltirgen», - dedi aıyptaý aktisin oqyǵan prokýror.
Jábirlenýshi dene jaraqaty saldarynan oqıǵa ornynda qaza tapqan.
Keıin sottalýshy jábirlenýshiniń denesinen qutylý, qylmystyq is-áreketin jasyrý maqsatynda máıittiń aıaq-qolyn búktep, kóliktiń júksalǵyshyna salyp qoıǵan.
Sotta sottalýshy óz kinásin moıyndady.
«Sot sottalýshyny 11 jylǵa bas bostandyǵynan aıyrý túrindegi jazaǵa tartty. Ol jazasyn qaýipsizdigi ortasha túzetý mekemesinde óteıdi. Sonymen birge jábirlenýshiniń ókiline 8 mln teńge moraldyq shyǵyn tóleýi tıis»,- dedi oblystyq sottyń baspasóz qyzmeti.
