Áıeldi 35 jerinen pyshaqtap, kóligine tyǵyp qoıǵan aqtóbeliktiń jazasy aýyrlady

AQTÓBE. QazAqparat - Aqtóbede áıeldi 35 jerden pyshaqtap óltirgen sottalýshynyń isi apellıatsııalyq tártipte qaıta qaraldy. Ol buǵan deıin 11 jylǵa bas bostandyǵynan aıyrylsa, endi jazasy qatańdatylyp, 15 jylǵa úkim kesildi, dep habarlaıdy QazAqparat tilshisi.

Aqtóbe oblystyq sotynyń qylmystyq ister jónindegi sot alqasynda 29 jastaǵy sottalýshynyń isi qaıta qaraldy. Birinshi satydaǵy sot úkiminiń kúshin joıýdy jáne Qylmystyq kodekstiń 99-baby 2-bólimi 5-tarmaǵy boıynsha jańa aıyptaý úkimin shyǵarýdy suraǵan prokýrordyń apellıatsııalyq ótinishhaty negizge alyndy. Sot alqasy jınaqtalǵan dáleldemelerdi zerdelep, «sottalýshynyń is-áreketi asa qatygezdikpen adam óltirý retinde qaıta saralaýǵa jatady» degen tujyrymǵa keldi.
«Sot alqasy birinshi satydaǵy sot úkiminiń kúshin joıyp, jańa aıyptaý úkimin jarııalady. 29 jastaǵy aqtóbelik asa qatygezdikpen adam óltirgeni úshin kináli dep tanylyp, oǵan 15 jyl merzimine bas bostandyǵynan aıyrý jazasy taǵaıyndaldy. Sottalǵannan jábirlenýshi ókiliniń paıdasyna 8 mıllıon teńge mólsherinde moraldyq zııan óndirildi. Apellıatsııalyq úkim zańdy kúshine endi», - dep habarlady Aqtóbe oblystyq sotynyń baspasóz qyzmeti.
Eske salsaq, qylmystyq oqıǵa bıyl boldy. Buǵan deıin habarlaǵanymyzdaı, 1976 jylǵy aqtóbelik áıel 23 aqpan kúni jumysqa shyǵyp, úıine qaıta oralmaǵan.

Polıtsııa izdeý jumystarynan soń 29 jastaǵy kúdiktini ustady. Ol áıeldi pyshaqtap óltirip, denesin eki kún boıy kóliginiń júksalǵyshynda saqtaǵan.