Áıelderge arnalǵan «Umaı» ıpotekasy qaıta iske qosyla ma

ALMATY. KAZINFORM — «Umaı» ıpotekasy 2021 jyly iske qosylyp, 2023 jylǵa deıin jumys istedi. 

Óńirlik kommýnıkatsııalar qyzmetiniń alańynda Otbasy banktiń Almaty fılıaly dırektorynyń orynbasary Kámshat Ońalbaeva bul baǵdarlamany qaıta iske qosý boıynsha jumys kelissóz satysynda ekenin málimdedi.

— «Umaı» áıelder ıpotekasy boıynsha qazirgi ýaqytta Azııa damý bankimen kelisimge qol qoıý protsesi júrip jatyr. Baǵdarlamanyń sharttary osy kelisimge qol qoıylǵannan keıin jarııalanady, — dep jaýap berdi ol.

Eske salaıyq, buǵan deıin baǵdarlamany 2025 jyldyń basynda jańartylǵan sharttarmen qaıta bastaý josparlanǵan edi. Biraq iske qosý merzimi keıinge shegerildi. Buryn jarııalanǵan talaptarǵa sáıkes, baǵdarlamaǵa qatysý úshin nesıe somasynyń 20%-yna deıingi mólsherdegi alǵashqy jarna «Otbasy bankindegi» depozıtte bolýy tıis. Baǵdarlamaǵa 18 ben 65 jas aralyǵyndaǵy, resmı tabysy bar jáne sońǵy alty aıda zeınetaqy jarnalaryn úzdiksiz aýdaryp kelgen áıelder qatysa alady.

Jańartylǵan sharttar boıynsha:

• Qaryzdyń eń shekti somasy 50 mln teńgege deıin ulǵaıýy múmkin;

• Otbasynyń jıyntyq taza tabysy — aıyna 950 myń teńgeden aspaýy tıis (buryn bul shek 640 myń teńge bolatyn);

• Baspanany bastapqy (jańa úı) jáne ekinshi naryqtan alýǵa bolady. Tek úıdiń paıdalanýǵa berilgen jyly 2016 jyldan erte bolmaýy shart.

Eske salaıyq, 2025 jyly Otbasy bankte 1 mıllıon depozıt ashyldy.