Áıelderdiń zeınetke shyǵý jasyn ulǵaıtý máselesi qarastyrylyp otyrǵan joq - mınıstr
ASTANA. 23 qarasha. QazAqparat /Gúlmıra Álıakparova/ - QR Eńbek jáne halyqty áleýmettik qorǵaý mınıstrligi áıelderdiń zeınetke shyǵý jasyn ulǵaıtýdy qarastyryp otyrǵan joq. Bul týraly búgin ótken baspasóz máslıhatynda atalmysh vedomstvo basshysy Gúlshara Ábdihalyqova málim etti.
«Búgingi kúni áıelderdiń zeınetke shyǵý jasyn ulǵaıtý máselesi kóterilip otyrǵan joq», - dedi mınıstr.
G.Ábdihalyqova naqtylaǵandaı, BUU Halyqty ornalastyrý salasyndaǵy qorynyń baǵdarlamasy aıasynda Azamattyq bastamalar ortalyǵy (úkimettik emes uıym) birqatar usynystar jasady. Solardyń arasynda zeınetke shyǵý jasyn (sonyń ishinde áıelderdiń) ulǵaıtý usynysy bar. ÚEU-nyń bul bastamasyna zeınettik jasty kóterýge baılanysty qazirgi halyqaralyq qoǵamdastyqta, sonyn ishinde Eýropadaǵy úrdister negiz bolǵan.
«Biraq bul usynys qabyldanyp, ol oryndalý ústinde degen sóz emes. Muny qabyldanǵan sheshim retinde túsinýdiń qajeti joq. Meniń oıymsha, qazir bar nazarymyzdy halyqty eńbekpen qamtý máselesine aýdarýymyz qajet», - dedi mınıstr.
Eske salaıyq, QR «Eńbek týraly» Zańda belgilengendeı, respýblıkada áıelderdiń zeınetke shyǵý jasy - 58, erlerdiki - 63.
