Áıelderdiń zeınetke shyǵý jasyn bala sanyna qaraı tómendetý usynyldy
Elimizde áıelderdiń zeınetke shyǵý jasy 2028 jylǵa deıin 61 jas deńgeıinde bekitilgenine toqtalǵan depýtat, aldaǵy jyldary Úkimet zeınetaqy júıesine qatysty ońtaıly sheshim jasaýy tıis ekenin aıtty.
«Statıstıka qarasaq, sońǵy úsh jylda áıelder arasynda ómir surý uzaqtyǵy 77-den 75,5 jasqa deıin, ıaǵnı 1,5 jylǵa azaıǵan. Sondyqtan elimizdegi áıelder zeınet jasyna erte shyqqany durys bolar edi», - dedi A. Jamalov Májilistiń jalpy otyrysynda Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha keńestik kezeńde áıelder shamamen 5-6 balany ómirge ákelip, úı jumysymen qatar, óndiriste de eńbek etetin.
«Sondyqtan zeınetke erte shyǵýy áıelder men ana eńbegin baǵalaýdyń ádil ótemaqysy retinde qaralatyn. Qazirgi álemde áıelderdiń eńbek jáne ómir súrý jaǵdaılary ózgerdi. Biz genderlik teńdikke umtylyp otyrmyz, sondaı-aq jumys jáne óndiris jaǵdaılary jaqsaryp keledi. Úı sharýalary jeńil jáne qaýipsiz bolyp jatyr. Alaıda bir fakt ózgerissiz qaldy. Bul turǵyda bala týǵan kezde áıelder jumystan ýaqytsha ketip, kásibı mansaby men tájirıbesi toqtap qalady. Elimizdegi ár áıel orta eseppen úsh balany ómirge ákeledi. Osy kezeńde tıisti jarna aýdarylmaǵandyqtan, olardyń zeınetaqysy da joǵary bolmaıdy. Bul rette áıelderdiń zeınetke erte shyǵýy túrinde jeńildik jasaýyl kerek. Degenmen mundaı quqyq zamanaýı jaǵdaılardy eskere otyryp, ádil túrde usynylýy kerek», - dedi depýtat.
«Qazirgi kezde 53 jastan 5 jáne odan da kóp bala týǵan, olardy segiz jasqa deıin tárbıelegen kópbalaly analar ǵana zeınetkerlikke shyǵady. Meniń oıymsha, joǵaryda atalǵandy eskere otyryp, Úkimet balasy bar analardyń zeınetke shyǵý jasyn azaıtý usynysyn qarastyrýy tıis. Ómirge kelgen ár bala úshin zeınetkerlik jasty eki jylǵa azaıtqan jón. Alaıda 10 jyldan aspaıtyn merzimge tómendetý kerek. Osy oraıda úsh balasy bar áıel zeınetke 6 jyl erte shyǵa alatyn bolady», - dedi Amanjan Jamalov.
