Áıelderdiń zeınetke shyǵý jasy 2014 jyldyń 1 qańtarynan bastap kezeń-kezeńmen ulǵaıtylady - Q. Kelimbetov
ASTANA. 12 naýryz. QazAqparat - Elimizde áıelderdiń zeınetkerlik jasyn birizdendirý maqsatynda 2014 jyldyń 1 qańtarynan ony kezeń-kezeńimen ulǵaıtý kózdeledi. Bul týraly búgin QR Parlamenti Májilisinde «Qazaqstan Respýblıkasyndaǵy zeınetaqymen qamsyzdandyrý týraly» jańa redaktsııadaǵy zań jobasyn tanystyrý rásiminde QR vıtse-premeri Qaırat Kelimbetov málim etti.
Vıtse-premerdiń aıtýynsha, jobaǵa sáıkes, elimizdegi áıelderdiń zeınetke shyǵý jasyn birizdendirý birtindep, 10 jyl boıy júzege asyrylady. «Jyl saıyn zeınetke shyǵatyn jas jarty jylǵa uzartylady. Budan bólek, vedomstvoaralyq komıssııa ony kóterýdi 2014 jylǵy 1 qańtardan bastap engizýdi usyndy. Ondaı usynys Úkimetke de engizilgen», - dedi QR vıtse-premeri Qaırat Kelimbetov.
Eńbek jáne halyqty áleýmettik qorǵaý mınıstri Serik Ábdenov te zeınetaqy jasyn arttyrýdy kezeń-kezeńimen júrgizý qajettigin alǵa tartady. «Bul rette halyqaralyq tájirıbege, bizdiń ózimizdiń 1998 jyldan bergi tájirıbemizge súıený mańyzdy», - deıdi mınıstr.
Toqtala ketetin jaıt, kóptegen elderde (Lıýksembýrg, Shveıtsarııa, Italııa, Fınlıandııa, Norvegııa jáne t.b.) zeınetkerlik jas 65-67 jasty quraıdy jáne bul jumysshynyń jynysyna baılanysty bolyp tabylmaıdy. Sonymen qatar, halyqtyń qartaıý úderisin eskere kele jáne áleýmettik qamsyzdandyrý júıesindegi oryn alǵan problemalarǵa oraı, kóptegen memleketter, atap aıtqanda Ulybrıtanııa, Germanııa, Frantsııa, Ońtústik Koreıa, Chehııa, Ázirbaıjan, Ýkraına, Estonııa zeınetke shyǵý jasyn ulǵaıtýdy josparlap otyr.
