Áıelderdiń zeınet jasyn arttyrmasa, zeınetaqy tóleýge jumsalatyn bıýdjet shyǵystary 2014-2024 jyldary 3 trıllıon teńgege ósedi - N. Nazarbaev
ASTANA. 7 maýsym. QazAqparat - Erler men áıelderdiń zeınetke shyǵý jasyn teńestirý týraly másele qazirgi eń ózekti taqyrypqa aınaldy.
Bul týraly búgin Qazaqstan Respýblıkasynyń Prezıdenti - Elbasy N.Á.Nazarbaev Qazaqstan halqyna zeınetaqy reformasynyń máseleleri jónindegi úndeýinde málimdedi.
«Respýblıka Konstıtýtsııasyna sáıkes meniń qaraýyma Úkimet pen Ulttyq Bank bastamashy bolǵan zeınetaqy júıesi týraly jańa zańnama kelip tústi. Men Zańnamany jaqtaýshylardyń da, oǵan qarsylyq bildirýshilerdiń de dálel-dáıekterimen jaqsy tanyspyn», - dedi Prezıdent N. Nazarbaev.
Onyń aıtýynsha, erler men áıelderdiń zeınetke shyǵý jasyn teńestirý týraly másele qazirgi eń ózekti taqyrypqa aınaldy.
«Munyń sebebin men Úkimet pen Ulttyq Bank is-áreketiniń olqylyǵynan da kóremin. Jalpy, men Úkimet pen Ulttyq Banktiń jańa zeınetaqy zańnamasyn halyqqa túsindirý jónindegi jumysyna oń baǵa bere almaımyn», - dep atap ótti Elbasy.
Onyń sózderinshe, birinshiden, osyndaı óte mańyzdy áleýmettik zań jobasy nemquraıly qaraldy.
Ekinshiden, ony halyqqa keńinen nasıhattaý isi durys júrgizilgen joq.
Nátıjesinde, qazaqstandyqtardyń kóbi zeınetaqy reformasynyń túpki mánin túsinbeı qaldy.
«Búginde zeınetaqy zańnamasyna ózgerister engizý kerek ekeni anyq! Bul - jahandyq úrdis. Eýropa Odaǵy men álemniń ózge de elderi daǵdarys pen quldyraý jaǵdaıynda osylaı jasaýǵa májbúr boldy.
Áıelderdiń zeınet jasyn arttyrýdyń basty sebebi zeınetaqy tóleýdegi qarajattyń boljamdy defıtsıti jáne zeınetkerlerdiń 70%-in áıelder quraıtyny boldy», - dedi Memleket basshysy úndeýinde.
Prezıdenttiń aıtýynsha, áıelderdiń zeınet jasyn arttyrmasa, zeınetaqy tóleýge jumsalatyn bıýdjet shyǵystary 2014-2024 jyldary 3 trıllıon teńgege ósedi.
«Bul memleketti zeınetaqy tóleýge qaýqarsyz etip, bolashaq zeınetkerler úshin problemaǵa aınalady. Sondyqtan biz bul máseleni qazirden bastap sheshýge tıispiz», - dedi Memleket basshysy.
