Áıelderdiń kópshiligi otbasyndaǵy zorlyq-zombylyqqa shydap júre beredi - polıtseı
PETROPAVL. QazAqparat – Petropavlda «Zorlyq-zombylyqsyz 16 kún» aktsııasy aıasynda 500 adam turǵylyqty jeri boıynsha tekserildi, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, «Zorlyq-zombylyqsyz 16 kún» aktsııasy bastalǵaly Petropavlda bes áıel polıtsııaǵa habarlasyp, keńes alǵan. Olardyń barlyǵy kúıeýleri qol kótergen jaǵdaıda ne isteý qajettigin bilmek bolǵan. Tártip saqshylary mundaıda eń aldymen aryz jazýǵa keńes beredi. Tek osydan keıin ǵana ýchaskelik polıtsııa qyzmetkerleri aralasyp, jaǵdaıdy baqylaýda ustaıdy, aldyn alý jumystaryn júrgizedi. Alaıda áıelderdiń eshqaısy bul keńesti paıdalanbaǵan.
«Áıelder óz ómirlerin jaqsy jaqqa ózgertýge asyqpaıdy, otbasyndaǵy zorlyq-zombylyqqa shydap júre beredi. Jaqynda daǵdarys ortalyǵyna qala turǵynyn ornalastyrdyq. Oǵan ishkish kúıeýi kún kórsetpeıdi. Birneshe jyl buryn kúıeýi ol áıeldi aýyr jaraqattap, sottaldy. Soǵan qaramastan qala turǵyny aıyrylysyp ketken joq. Bul - kópshilik áıelderge tán. «Zorlyq-zombylyqsyz 16 kún» aktsııasynyń maqsaty da osyndaı zardap shegýshilermen jumys isteý, olardyń quqyqtaryn túsindirip, keńes berý», - deıdi Petropavl qalalyq polıtsııa basqarmasynyń áıelderdi zorlyq-zombylyqtan qorǵaý tobynyń aǵa ınspektory Ásem Іlııasova.
Aktsııa 25 qarasha men 10 jeltoqsan aralyǵynda ótti. Polıtseıler operatsııa aıasynda janjalqoı retinde esepte turǵan 500-den astam turǵyndy tekserdi. Zań buzýshylarǵa 84 qorǵanysh uıǵarymy berildi. 25-ine erekshe talap qoıyldy. Sondaı-aq 11 maskúnem májbúrli túrde emdelýge jiberildi.
Polıtseıler otbasyndaǵy zorlyq-zombylyqqa qatysty 8 7152 49-31-58 nemese 8-708-432-45-61 WhatsApp bar telefon nómirine jáne 150 «qaýyrt jelisine» habarlasýǵa bolatynyn eske salady.
