Áıelderdiń er-azamatqa qaraǵanda jaýapkershiligi mol - Elbasy
ASTANA. 7 naýryz. QazAqparat - Áıelderdiń er-azamatqa qaraǵanda jaýapkershiligi mol. Búgin Aqordada 8 naýryz halyqaralyq merekesine oraı áıelder qoǵamdastyǵy ókilderimen kezdesken QR Prezıdenti N.Nazarbaev osylaı málim etti.
Mańyzdy sheshimder qabyldanatyn qyzmetterge áıel qaýymyn jiberý qajet emes degen pikirmen kelispeıtindigin basa aıtqan Elbasy: «Meniń ómirlik tájirıbem kórsetkendeı, er-azamattyń ornyna áıelderdi qoıǵan kezde árqashanda da zor tártip oryndalady. Іske senimdilik, ádildik ár kezde de qamtamasyz etiledi. Er-azamattar renjimesin, bul shyndyq. árbir basshylyqtaǵy erkek buny moıyndaýy tıisti. Óıtkeni sizder tabıǵattaryńyzdan-aq jaýapkershilikterińiz mol», - dedi.
Sonymen qatar Memleket basshysynyń atap ótýinshe, áıelder qaýymy Qazaqstan memleketin nyǵaıtý isine belsendi qatysyp keledi. Máselen, densaýlyq saqtaý jáne bilim berý salasynda jumys isteıtinderdiń 90 paıyzyn áıelder quraıdy. Respýblıkada bızneske beriletin nesıeniń 40 paıyzy da názik jandylardyń enshisinde.
Aıta keteıik, 8 naýryz halyqaralyq áıelder kúni qarsańynda Elbasy quttyqtaý úshin qabyldaǵan názik jandylardyń ishinde Eńbek jáne halyqty áleýmettik qorǵaý mınıstri Gúlshara Ábdihalyqova, Qurmanǵazy atyndaǵy qazaq ulttyq konservatorııasynyń rektory Jánııa Áýbákirova, OQO-dan kelgen kópbalaly ana Gúlmıra Nyshanbaeva, sondaı-aq elimizdiń túrli salalarynda jumys isteıtin basqa da belgili áıel azamatshalar boldy.
