Áıelderdiń 63 jastan zeınetke shyǵýy tek 2023 jyldan bastap júzege asady - T. Dúısenova
ASTANA. 5 sáýir. QazAqparat - Áıelderdiń 63 jastan zeınetke shyǵýy tek 2023 jyldan bastap júzege asady. Bul týraly «Qazaqstan» ulttyq arnasyndaǵy «Alań» baǵdarlamasyna qatysqan Eńbek jáne halyqty áleýmettik qorǵaý vıtse-mınıstri Tamara Dúısenova osylaı málim etti. Elimizdegi zeınetaqy júıesindegi jańalyqtarǵa arnalǵan atalmysh baǵdarlamany aldaǵy ýaqytta ulttyq arnadan tamashalaı alasyzdar.
«Eń aldymen bir nárseni túsinip alýymyz kerek - áıelderdiń 63 jastan zeınetke shyǵýy bul tek 2023 jyldan bastalady. Buǵan on jyl boıy satylap baramyz», - deıdi vıtse-mınıstr. Al zeınet jasyn uzartýdyń sebepterine toqtalǵan ol bylaı dedi: «Biz 1998 jyly jınaqtaýshy zeınetaqy júıesine óttik. Sol kezdegi zańda áıel azamattaryna 1 qańtar 1998 jylǵa deıingi eńbek ótili bolsa, oǵan memlekettik bıýdjetten zeınetaqy tóleımiz degen edik. Al 1998 jyldan keıingi eńbekke aralasqan azamattar ózderiniń eńbekaqysynan 10 paıyz jınaqtaýǵa aýdaryp, keıin buny arnaıy qorlardan alatyn bolǵan. Máselen, bıylǵy jyly 1955 jyly týǵan áıel azamatshalar zeınetke shyǵyp jatyr. Egerde olardy 18 jastan eńbek etti dep eseptesek, olardyń úzdiksiz eńbek ótili 23-24 jyl. Alaıda, olardyń balaly bolǵan, sol úshin demalysqa shyqqan ýaqyttary da bar. Dál osylaı eseppen 2018 jyly zeınetke shyǵatyndardy 1960 jyly týǵandar dep keltirsek, olardyń eńbek ótili 19 jyl, odan keıingilerdiki de solaı tómendeı beredi. Al eńbek ótili tómendedi degen sóz, memleketten beriletin zeınetaqynyń mólsheri de tómendeıtinin bildiredi. Sebebi biz qazir zeınetaqyny azamattardyń eńbek ótili jáne eńbekaqysyna qarap tóleımiz».
Vıtse-mınıstrdiń aıtýyna qaraǵanda, Úkimettik zań jobasynyń negizgi mazmuny 2018 jyldan bastap zeınetke shyǵatyn áıel azamatshalardyń jınaqtaýshy zeınetaqy qoryndaǵy qarajatty kóbeıtýge yqpal etý.
Zeınetaqy júıesindegi basqa da jańalyqtar týraly baǵdarlamada órbigen áńgimeniń tolyq nusqasyn «Alań» baǵdarlamasynyń aldaǵy shyǵarylymynan kóre alasyzdar.
