Áıelderdiń 50 jasta da zeınetke shyǵý quqy saqtalady - mınıstr S. Ábdenov
ASTANA. 3 sáýir. QazAqparat - Áıelderdiń 50 jasta da zeınetke shyǵý quqy saqtalady. Búgin Parlament Májilisinde «Zeınetaqymen qamsyzdandyrý týraly» jáne «Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» zań jobasynyń kezekti tanystyrylymy barysynda Eńbek jáne halyqty áleýmettik qorǵaý mınıstri Serik Ábdenov osylaı málim etti.
Mınıstrdiń aıtýynsha, búgingi tańda jeke zeınetaqy shottarynyń jalpy sanynyń 45 paıyzy áıelderge tıesili. Sondaı-aq, áıelderdiń ortasha zeınetaqy úlesi er adamdarǵa qaraǵanda 25 paıyzǵa tómen.
«Áıel adamdardyń zeınet jasyn teńestirý arqasynda olardyń joǵary zeınetaqy alý múmkindigi de artady. Osy usynysty kezeń-kezeńmen 10 jyl ishinde jyl saıyn áıelderdiń zeınetke shyǵý jasyn 6 aıǵa ulǵaıtý arqyly iske asyrýdy josparlaımyz»,-dedi mınıstr S. Ábdenov.
Sonymen qatar mınıstr áıelder úshin zeınetke 50 jasta da shyǵý quqy saqtalatynyn atap ótti. «Ol úshin olardyń zeınetkerlik jınaq salymy jetkilikti bolýy shart. Budan bólek 1998 jyldyń 1 qańtaryna deıingi eńbek stajy saqtalǵan áıelderge de erte zeınetke shyǵý quqy saqtalady. 53 jasta 5 jáne odan da kóp bala týǵan áıelderge de erte zeınetke shyǵý quqy qarastyrylady»,-dedi mınıstr.
