Áıelderdi uryp-soǵýdy qoldaǵan EUÝ oqytýshysy jumystan shyǵaryldy

NUR-SULTAN. QazAqparat - L. N. Gýmılev atyndaǵy Eýrazııa ulttyq ýnıversıteti áıelderdi uryp-soǵý týraly atyshýly pikir jazǵan oqytýshyny jumystan shyǵardy, dep habarlaıdy QazAqparat.

Buǵan deıin áleýmettik jelide E. Súleımenov esimdi qoldanýshy áıelderdi urý kerektigin jazyp, ózin ıslamıst, ultshyl, jıdofob dep ataǵan. Keıinirek onyń Eýrazııa ulttyq ýnıversıtetiniń oqytýshysy ekeni anyqtaldy.

«Ýnıversıtet E. Súleımenovke qatysty tekserý jumystaryn qorytyndylady. Etıka jónindegi komıssııa onyń is-áreketin jalpyadamzattyq ádep normalaryna saı kelmeıdi dep baǵalady. Atalǵan komıssııa usynymymen E. Súleımenovpen eńbek kelisimshartyn buzý týraly rektor buıryǵy shyqty», - dep jazdy EUÝ baspasóz qyzmeti.