Áıelderdi qaqtyǵystardy beıbit jolmen sheshý protsesterine belsendi tartý usynyldy
NUR-SULTAN. QazAqparat - QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lazzat Ramazanova qaqtyǵystardy beıbit jolmen sheshý protsesterine áıelderdi belsendi tartýǵa shaqyrdy, dep habarlaıdy QazAqparat.
Bul másele 2020 jylǵy 2 jeltoqsanda ótken BUU Qaýipsizdik keńesiniń 1325 qararyn júzege asyrý týraly Eýropadaǵy qaýipsizdik jáne yntymaqtastyq uıymynyń halyqaralyq dóńgelek ústeli otyrysynda kóterildi. Qarardyń máni – beıbitshilik pen qaýipsizdikti nyǵaıtý jónindegi is-sharalarǵa áıelderdiń qatysýyn jan-jaqty qamtamasyz etý.
Lazzat Ramazanovanyń aıtýynsha, «Áıelder, beıbitshilik jáne qaýipsizdik» taqyryby búgingi kún tártibinde óte ózekti másele. Sheshimin tappaǵan qaqtyǵystar sanynyń kóbeıýi, álemniń túpkir-túpkirinde bolyp jatqan shıelenister, tabıǵı kataklızmderdiń artýy jáne COVID-19 pandemııasy ábigerge túsirgeni anyq.
«Búginde barlyq elder, sonyń ishinde Qazaqstan, BUU Qaýipsizdik keńesiniń 1325 qararyn júzege asyrý boıynsha tıimdi jospardy múmkindiginshe tez arada qabyldaýy kerek. Beıbit qurylysy protsesinde qaqtyǵystardy aldyn alý jáne sheshýge áıelder belsendi túrde tartylý qajet», - dep atap ótti Lazzat Ramazanova.
Onyń aıtýynsha, BUU Qaýipsizdik keńesiniń qararlary «Áıelder, beıbitshilik jáne qaýipsizdik» kún tártibi boıynsha birqatar máselelerdi retteýge múmkindik beretin normatıvtik-quqyqtyq bazany qurdy. Alaıda, áıelder resmı protsester men kelissózderge áli de az qatysady. Sondyqtan áıelderdiń beıbit kelissózder men kelisimderge tıimdi qatysýyn qamtamasyz etý jónindegi sharalardy kúsheıtý, sondaı-aq osy máselege qatysty sheshim qabyldaýdyń barlyq deńgeıinde áıelderdiń kóptep qatysýyn qamtamasyz etý qajet.
L.Ramazanova qazirgi ýaqytta Qazaqstanda 2030 jylǵa deıingi Otbasylyq jáne genderlik saıasat tujyrymdamasy iske asyrylyp jatqanyn eske saldy. Tujyrymdama ındıkatorlarynyń qatarynda beıbitshilik pen qaýipsizdikti qamtamasyz etýde áıelderdiń úlesin arttyrýǵa qol jetkizý josparlanyp otyr. Qazirgi ýaqytta Tujyrymdamanyń 2020-2022 jyldarǵa arnalǵan ekinshi kezeńiniń is-sharalar jospary iske asyrylýda, onyń aıasynda «Áıelder, beıbitshilik jáne qaýipsizdik» bóliminiń is-sharalaryn ótkizý kózdelgen. Jaýapty organdar, atap aıtqanda Qorǵanys mınıstrligi, Іshki ister mınıstrligi, Tótenshe jaǵdaılar mınıstrligi jáne basqa da birqatar memlekettik organdar osy kún tártibi boıynsha BUU Qaýipsizdik keńesiniń qararlaryn tıimdi júzege asyrý úshin naqty is-sharalar ázirleýi qajet.
«Máseleniń máni - soǵysty áıelder úshin «qaýipsiz» etý emes, soǵys pen qaqtyǵystar qaıtalap oryn almaıtyn beıbitshilik qurylym qurý. Qazaqstan áıelderdiń beıbit kelissózder ústelinde, sheshim qabyldaýǵa jáne bitimgershilik toptarǵa qatysýy úshin barlyq kúsh-jigerin salatyn bolady», - dep túıindedi komıssııa tóraıymy.
Esterińizge sala keteıik, 1325 qararyn Birikken Ulttar Uıymynyń Qaýipsizdik keńesi 2000 jyly 31 qazanda qabyldaǵan bolatyn. Búgingi tańda 90-ǵa jýyq memleket áıelder, beıbitshilik jáne qaýipsizdik týraly kún tártibin júzege asyrý úshin ulttyq is-qımyl josparyn qabyldady.
