Áıelderde bolýy múmkin júrek aýrýlaryn qalaı emdeý kerek – dáriger keńesi
ALMATY. KAZINFORM - Júrek aýrýy – erler men áıelder óliminiń negizgi sebepteriniń biri. Bul rette áıelderde júrek aýrýynyń belgileri, kórinisi men emdeýde erekshelikter bolýy múmkin. Bul týraly Almaty qalalyq kardıologııa ortalyǵynyń dárigeri Ámına Rakısheva aıtyp berdi.
Dárigerdiń aıtýynsha, áıelderde júrek bulshyqetiniń qanmen jetkilikti túrde qamtamasyz etilmeýine baılanysty paıda bolatyn júrektiń ıshemııalyq aýrýy jıi kezdesedi.
«Áıelderde júrektiń ıshemııalyq aýrýynyń belgileri erlerdegideı anyq kórinbeýi múmkin. Áıelder sharshaý, entigý, álsizdik, júrek aıný, tipti arqa nemese jaqtaǵy aýyrsynýdy sezinýi múmkin. Sondaı-aq, áıelderde jıi kezdesetin keelsi aýrý – arıtmııa, ıaǵnı, júrek yrǵaǵynyń buzylýy. Áıelderde arıtmııa sýbtıldi túrde kórinýi múmkin, ol sondaı-aq jıi baıqalmaıdy. Onyń belgileri júrektiń shalys soǵýy, júrek soǵý jıiliginiń joǵarylaýy, bas aınalý nemese álsizdik jatýy múmkin», - deıdi dáriger.
Sondaı-aq júrek jetkiliksizdigi, klapan aqaýy, gıpertonııa, basqa da júrek aýrýlaryna nazar aýdarý mańyzdy. Áıelderde bul aýrýlardyń kórinisi men eminde ózindik erekshelikter bolýy múmkin.
«Áıelderde júrek aýrýlaryn emdeý dári-dármek terapııasy, ómir saltyn túzetý, durys tamaqtaný, fızıkalyq belsendilik, ablıatsııa protsedýralary, tipti hırýrgııalyq aralasýdy qamtýy múmkin. Júrek aýrýyn ózdiginen dıagnostıkalaý men emdeý qaýipti bolýy múmkin ekenin este ustaǵan jón, sondyqtan júrek problemalaryna kúdik týyndaǵan kezde dıagnoz qoıý jáne tıisti em taǵaıyndaý úshin dárigerge kóriný kerek.
Júrek problemalaryn ýaqtyly anyqtaý jáne emdeý densaýlyq pen ómir sapasyn saqtaýǵa kómektesedi», - dedi Ámına Rakısheva.
