Áıelderdi tek quqyqtyq turǵyda ǵana qoldap qoımaýymyz kerek - Lázzat Súleımen
ASTANA. KAZINFORM – Qazaqstandaǵy «BUU-áıelder» qurylymy uıymdastyrǵan baspasóz jıynynda Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasy tóraǵasynyń orynbasary Lázzat Súleımen zorlyq-zombylyqtyń shekarasy joq ekenin aıtty.
«Álemdik problema. Bizdiń qoǵamda da ýshyǵyp tur. Halyq arasynda otbasylyq zorlyq-zombylyq máselesi jıi talqylanatyn boldy. Memlekettik deńgeıde kóterilip, áıelder men balalardyń quqyǵyn qorǵaý týraly zań jobasy ázirlenip jatqany belgili. Onda turmystyq zorlyq-zombylyq máselelerin sheshýdiń jan-jaqty tásilderi qarastyrylǵan. Atap aıtsaq, otbasylarǵa kómek kórsetý ınfraqurylymyn qalyptastyrýǵa baǵyttalǵan ózgeristerdi, sondaı-aq turmys salasyndaǵy qylmystar jáne balalarǵa qarsy jasalǵan zorlyq-zombylyqtyń barlyq túri úshin jazany kúsheıtýdi atap ótýge bolady. Máselen, adamdy uryp-soqqany, densaýlyqqa jeńil, aýyrlyǵy ortasha jáne aýyr zııan keltirgeni, azaptap-qınaǵany úshin qylmystyq jaýapkershilik engizildi jáne kúsheıtildi», - dedi ol.
Aıtpaqshy, Lázzat Súleımen 2020 jyly senator qyzmetin atqarǵanda osy zańnyń bastamashylary qatarynda bolǵan.
«Zańmen másele túpkilikti sheshilmeıtini belgili. Osy rette, otbasy ınstıtýtyn damytý maqsatynda ár aýdanda otbasylardy qoldaý ortalyqtary ashylýda. Jalpy, áıelderdi qoldaý tek quqyq baǵytynda ǵana jalǵaspaýy kerek. Áıeldiń bilim alyp, ózin damytýǵa jaǵdaı jasalýy mańyzdy. Bul baǵytta Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasy keshendi baǵdarlamalar ázirlep, quzyrly organdarmen birge júıeli jumystar atqaryp keledi. Bul túıtkildiń túıinin tarqatýǵa qoǵamnyń ár múshesi úles qosqany abzal», - dedi L. Súleımen.
QR Mádenıet jáne aqparat mınıstrligi Jastar jáne otbasy isteri komıteti tóraǵasynyń orynbasary Naıla Muhtarova zorlyq-zombylyqtyń ýshyǵýy genderlik stereotıptermen de baılanysty ekenin jetkizdi. Bul rette, mınıstrlik daǵdarys ortalyqtarynyń jumysyn barynsha qoldaýda. Agressorlarmen psıhokorrektsııalyq jumys jobasynyń ádistemesin ázirlep, qazaqstandyq bilim berý júıesine genderlik magıstratýrany engizýde.
