Áıelder jumyssyzdyǵynyń syry nede?
ASTANA. 28 qarasha. QazAQparat - Astana qalasy ákimdiginiń Jumyspen qamtý ortalyǵyna toqsan saıyn 1000-1200 shamasynda jumyssyz tirkeledi. Olardyń 700-ge jýyǵy - názik jandylar. Sonymen, áıelder jalaqyly jumysy joq jalpy azamattar sanynyń shamamen 60-70%-yn quraıdy. Bul týraly astana.kz saıtyna Áıelder isteri jáne otbasylyq-demografııalyq saıasat komıssııasynyń hatshysy Lázzat Qusaıynova málim etti.
«Eń qyzyǵy, elimizdiń jalpy turǵyndarynyń sanyna shaqqanda áıelder erlerden birneshe paıyz asyp túsedi. Sonymen qatar kóptegen áleýmettik zertteýlerdiń nátıjesi kórsetkenindeı, áıelder bilimdi bolyp keledi. Eki nemese odan da kóp joǵary bilimi barlar jıi kezdesedi. Soǵan qaramastan, eńbek naryǵynda olar qysym kórip júr. Suranys negizinen erlerge túsedi. Áıelderge kem suranys bolatyndyǵynyń basty sebebi, olar otbasy, bala-shaǵa, basqa da túıtkildi máselelerge kóbirek nazar aýdaratyndyqtan, jumys berýshiler olardy ózderine jumysqa alǵysy kelmeıdi», - dep túsindirdi Komıssııa hatshysy.
«Sonymen qatar, erler otbasy túıtkilderine az nazar aýdarady, ekinshi sózben aıtqanda, olar áıelder sııaqty ondaı nársege jandary qatty aýyrmaıdy. Sosyn kúsh-qaırat jaǵynan olardyń basymdyǵy aıqyn. Al dene kúshin kóbirek qajet etetin bos jumys oryndary bizde az emes. Sondyqtan, tabıǵatynan názik bolǵasyn áıelder ondaı jumystardy atqara almaıdy», - dep sanaıdy psıholog Natalıa Semenenko.
Qalalyq Jumyspen qamtý jáne áleýmettik baǵdarlamalar basqarmasynan habarlaǵanyndaı, jumyssyz júrgen áıelderdiń kópshiligi áleýmettik qorǵaýǵa óte muqtaj adamdar. Olar oqıtyn áıelder, mektepke deıingi jáne múgedek balalary bar, jalǵyzbasty, kópbalaly nemese zeınet jasynyń aldyndaǵy áıelder, sondaı-aq, túrmeden bosaǵan jáne sottyń sheshimimen májbúrli emdeýden ótken áıelder.
