«Áıelder zeınetke 63-te shyǵady» - respýblıkalyq basylymdarǵa sholý
***
«Mádenıet jáne aqparat mınıstri Darhan Myńbaı Almaty qalasyndaǵy elimizdiń tanymal óner qaıratkerlerimen jáne mádenıet salasynyń ardagerlerimen, birqatar BAQ basshylarymen erkin suhbattasý túrindegi kezdesý ótkizdi», dep jazady «Egemen Qazaqstan» gazeti búgingi sanyndaǵy «Rýhanııatqa qurmet» degen taqyryptaǵy maqalasynda. Basylymnyń atap ótýinshe, D.Myńbaı elimizdiń mádenıet jáne aqparat salalaryn ilgeriletýge baılanysty mejelenip otyrǵan mınıstrliktiń bolashaq josparlaryn ortaǵa salyp, ony iske asyrý barysynda aǵa býyn ókilderiniń ómirlik ári kásibı tájirıbesi asa qajet ekenine toqtaldy. Bıyl qazaq ónerine teńdessiz úles qosyp, ólsheýsiz eńbek sińirgen І.Omarov, K.Baıseıitova, Sh.Jıenqulova, J.Omarova syndy aıtýly tulǵalardyń 100 jyldyq mereıtoılarynyń taǵylymy jaıynda, olardyń qaldyrǵan murasyn búgingi kúnniń kádesine jaratý máselesi de keńinen áńgime boldy.
***
«Qazaqstandaǵy kásiporyndardyń úshten birinde eńbek daýy týyndaýy múmkin. Bul týraly keshe BNews.kz portalyndaǵy onlaın-konferentsııada Eńbek jáne halyqty áleýmettik qorǵaý mınıstri Gúlshara Ábdihalyqova málimdedi», dep jazady «Aıqyn» gazeti. Mınıstrlik bul qorytyndyǵa 5 myńnan astam kásiporynǵa júrgizilgen tekserýden keıin kelip otyr. Osynshama kásiporynnyń 25-30 paıyzy jumysshylaryna jalaqyny ýaqytynda tóleı almaýda. Sondyqtan atalǵan kásiporyndarǵa taǵy da tekserý júrgizilmek. Maqala «Kúdikti kásiporyndar bar» degen taqyryppen berilgen.
***
«Áıelder zeınetke 63-te shyǵady». «Aıqyn» gazetiniń jazýynsha, bul jel sóz emes, solaı bolady, biraq birden emes, 5-10 jylda birtindep zeınet jasy ulǵaıtylyp otyrady. Ulttyq bank basshysy Grıgorıı Marchenko myrza bul sheshimniń ózgertilmeıtinin málimdep otyr. «Sarapshylardyń pikirine qulaq túretin bolsaq, bul aldymen jınaqtaýshy zeınetaqy qorlarynyń sharasyzdyǵyn jabý kerek boldy. Sonymen qatar memlekettik bıýdjet moınyndaǵy júkti de jeńildetý qajet bolyp tur. ıAǵnı áıelderdiń zeınet jasyn erlermen teńestire otyryp, olardyń bolashaqtaǵy kúnkóriske qajet jınaǵyn kóbirek jınaýǵa múmkindik berý kózdelýde. Áıtse de sol kóbirek jınalatyn jınaq máresine áıelderdiń bári birdeı jete ala ma eken? Taza kabınetterde jumys istep júrgender men dalada, aýyr qurylystarda eńbek etetin áıelderdi salystyrýǵa bolmaıtyny esepke alynbaýy shynynda da ókinishti», - dep jazady basylym.
***
«Alash aınasy» gazetiniń turaqty «Dat!» aıdarynda boksshy, Olımpıada chempıony Ermahan Ybyraıymovpen aradaǵy suhbat «Rıngte júrgen jigitterimizge ózimniń mıymdy oıyp alyp, ýaqytsha bere turǵym keledi» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Qazir boks stıli ózgerdi. Eki boksshy rıngtiń ortasyna turyp alady da, betterin búrkenip, bir-birin qoıǵyshtaýǵa tyrysady. Osylaı bastarymen tiresip alyp aıqasady. Shyny kerek, bul bokstyń óner retindegi «reńin» joıyp barady», - deıdi.
***
«Qazaqstanda qazaq tilinde «Danalar izimen» atty 12 serııadan turatyn derekti-pýblıtsıstıkalyq fılm túsirildi», - dep jazady «Kazahstanskaıa pravda» gazeti. Basylymnyń atap ótýinshe, bul fılm qazaq dalasynan shyqqan Hıbatýlla at-Tarazı, Kaýam at-dın ál-Itkanı sekildi ıslam ǵulamalarynyń, Ábýbákir Kerderı, Beket ata, Sultan Beıbarys sekildi uly oıshyldarymyz ben el basqarǵan qaıratker babalarymyzdyń ómiriniń bizge beımálim tustaryn qamtıtyn tyń derekterden turady. Derekti fılm Qazaqstan musylmandary dinı basqarmasynyń qatysýymen túsirildi. «Danalar izimen» fılminiń ár serııasynyń uzaqtyǵy 21 mınýtty quraıdy. Fılm qasıetti Ramazan aıynda, naqtyraq aıtqanda, 31 shildede 17:35-te «Qazaqstan» ulttyq arnasynda, al 30 shildeden bastap 20:30-da «Mádenıet» arnasy arqyly kórsetiletin bolady.
