Áıelder vagony taǵy úsh baǵytqa qatynaıdy
ASTANA. QazAqparat - «Qazaqstan temirjoly» ulttyq kompanııasy áıelder vagony taǵy úsh baǵytqa qatynaıtynyn málimdedi, dep habarlaıdy QazAqparat.
«Áıelder vagondaryna suranystyń artýyna baılanysty «Jolaýshylar tasymaly» AQ qozǵalys geografııasyn keńeıtýdi jalǵastyrýda. Vagondar №3/4 «Astana – Almaty», №33/34 «Almaty – Aqtóbe» jáne №71/72 «Astana – Shymkent» baǵytyndaǵy úsh poıyzdyń quramyna engiziledi», - dep jazdy kompanııadan.
Aıta keteıik, pılottyq rejımde bul qyzmet 2021 jyly engizilgen. Áıelder vagondaryndaǵy qozǵalys jaılylyǵyn birinshi bolyp №77/78 «Almaty – Mańǵystaý» jáne №351/352 «Almaty – Óskemen» poıyzdarynyń jolaýshylary baǵalady.
2022 jyldyń aqpan aıynan bastap kompanııa áıelder vagondarynyń sanyn arttyrdy. Ol №37/38 «Mańǵystaý – Semeı», №47/48 «Astana – Atyraý» jáne №45/46 «Pavlodar – Túrkistan» poıyzdarynyń quramynda júre bastady.
