Áıelder vagony iske qosylǵaly ony 822 myńnan astam adam paıdalanǵan
ASTANA. KAZINFORM — Ulttyq tasymaldaýshy poıyzdarynda áıelderge arnalǵan vagondar qyzmeti iske qosylǵannan beri ony 822 myńnan astam áıel jolaýshy paıdalanǵan, dep habarlaıdy «QTJ» UK» aktsıonerlik qoǵamynyń baspasóz qyzmeti.
Bul derek atalǵan servıstiń ózektiligin jáne temirjol kóligin qolaıly qatynas quraly retinde tańdaıtyn áıelder arasynda joǵary suranysqa ıe ekenin kórsetedi.
Qazirgi ýaqytta áıelder vagondary tómendegi 12 baǵytta qatynaıdy:
• № 77/78 «Almaty — Mańǵystaý»,
• № 351/352 «Almaty — Mańǵystaý»,
• № 45/46 «Pavlodar — Túrkistan»,
• № 37/38 «Mańǵystaý — Semeı»,
• № 47/48 «Atyraý — Astana»,
• № 33/34 «Aqtóbe — Almaty»,
• № 4/3 «Astana — Almaty»,
• № 71/72 «Astana — Shymkent»,
• № 354/353 «Astana — Semeı»,
• № 24/23 «Aqtóbe — Almaty»,
• № 25/26 «Almaty — Shymkent»,
• № 614/613 «Oral — Mańǵystaý».
— Atalǵan vagondarǵa bıletter tek áıel jolaýshylarǵa satylady. Sonymen qatar, bul vagondarda áıel jolserikter ǵana qyzmet kórsetedi. Áıel jolaýshylarmen birge jeti jasqa deıingi er balalardyń jol júrýine ruqsat etiledi, — delingen habarlamada.
Áıelder vagonyna bılet vokzal kassalarynda nemese bilet.railways.kz resmı saıty arqyly onlaın túrde rásimdeledi. Onlaın satyp alý kezinde bılette kórsetilgen «JN» belgisine nazar aýdarý qajet — bul tańdalǵan orynnyń áıelder vagonynda ekenin bildiredi. Bıletterdi satý poıyzdyń jóneltilýine 45 kún qalǵanda ashylady, bul jolaýshylarǵa saparyn aldyn ala josparlaýǵa múmkindik beredi.
Syǵan deıin poıyzda alyp júrýge tyıym salynǵan zattar týraly jazǵan edik.